Skip to main content

Культуран гIулакх лорадар

Кавказа VR видео-энциклопеди кхолларгда республикерча кагирхоша

Кагирхой гIулакхах йолча федеральни агентствас кхайкаяьча Ерригача Россе грантови конкурсе белгалъяьлар вай мехкахочо Кулбужнаькъан Берда кхелла «Кавказа VR видео-энциклопеди» яха проект. Къилбаседа Кавказа хозленаш ерригача Россен гойта, цун ерригача регионашка гIолла го баккха наькъа араяргья кагирхоех йола тоаба.

Керте латтар да из деррига малагIча боараме хьагойт хьажархошта. VR оалача режиме 360 градусах дIахьоргба из болх. «Из боккха кхоллама болх вIашагIбеллаб дуккхача къамаех латтача Къилбаседа Кавказа истори массарашта дIадовзийта. Тахан латтача ханага хьежжа дIахьу из болх къонабараша.

Проект кхеллай дегIа могаш эшаенна нах чулоацаш. Тахан дIалела йиш йоацаш бисача наха тхьовра, могаш болача хана шоашта дайнача бесса деррига гургдолаш. Тхоашта могар дергда оаха диззача вахара юкъе уж чубоалабе. Массане сакъердлуш дола хIама, Кавказа культур царна а дизза бIарга гургдолаш. Цу проекто чIоагIбергба къамашта юкъера бувзам. Ерригача Кавказера кагирхой хургба цу юкъе дакъа лоацаш», — дийцар тха газетага проекта кулгалдеш волча Кулбужнаькъан Берда.

Кхыйолча проекташта тара боацаш болх ба цу наха дIахьоргбар. Къилбаседа Кавказа дIаьхий дола истори, культур, тамашийна йола оамалаш, деррига а довзийташ, чулоацаш вIашагIъеллай проект. Кулбужнаькъан Бердо вIашагIтехача тоабо ший тайпара дIахьоргба из боккха болх.

Къонабарашта юкъе аьттув болаш, беркате проект хургья цох Дала аьннадале.

«Таханарча ерригача проекташка боккхийчара къонабарашка шоай меттаца дувц Кавказа культурах, исторех, Iадатех.

ХIаьта оаха кхеллача проекте шоай ханнарачарга кагирхоша шоаш, вIаши кхетабеш болча меттаца, оамалца гойтаргда деррига. Иштта кхеллача проекто наьха оамалаш, лерхIамаш вIашка озаргда аьнна хет сона. Тайп-тайпара культур, Iадаташ леладеш болча наха вIаши тарадараш а короргда дуккха. Къамашта юкъера барт-безам чIоагIлургба аьнна хет сона ишттача наькъаца», — аьлар Кулбужнаькъан Берда.