Йоккхача Ачалкхе бахача наха доккха дикахетар хулаш, хувцам хиннаб юрта. Цига еттай керда ишкол. 720 бера лаьрхIа йолча ишколо кастта ший наIараш хьаелларгья, хьаьший тIаэцаш. «3,4 га дола доазув дIалаьца улла ишкол хьалъеш дIадахар 635 млн сом ахча да. «Дешар» яхача къаман проектага гIолла дIахьош ба из беркате болх.
Таханарча дийнахьа, чухьнахьа эшаш мел йола хIамаш Iоувттаеш, хьинаре къахьегаш боахк болхлой», — йоах тхога бенача хоамо.
ЭсамбаевгIар оалача урам тIа латт ший хозалца бIарг тIаозаш йола керда ишкол. Цу ишколага бахархоша сатувса дукха ха яр.
Кхыйолча цу юртарча ишколашкара хьал хIанз дикка аттачахьа дерзаргда.
