ГIажарий-Юрта хьалъеш латтача ишкола балхага хьажа баха хилар «ЦаI йола Росси» яхача парте секретарь вола Йовлой Мухьмад, ГIажарий-Юртарча администраце кулгалхо, депутаташ. Къаман программага гIолла хьалъеш латтача кердача ишколо 420 бер чуэцаргда. Кхозза вIаштIаръяь ишкол юртал арахьа хьалъеш латт. ДIадахача шера ахкан шоллагIча бетта дIаболабир из болх. Ишкол йистеяккха лерхI укх шера Iай.
«Кердача ишколе берашта мел эша кхоачам хургба. ХIара урока мел эша лаборатореш, йоккха спортивни зал, актови зал, иштта кхыдараш а долаш хургья из, хьалъяь яьлча. Ара бургацах ловза, спортивни ловзараш дIакхахьа моттигаш ергья. ДегIа могашал эшаеннача берашта лаьрхIа эшар хьадаьд цига. Таханарча хано дIадеххача тайпара тоаяь хила еза ишколаш», — дийцар единороссаша. Къаман гуллама депутаташа лакха тIахьожам лоаттабу цу гIулакха.
ХIара керда ишкол вай къаман доккха совгIат да, цунга хьежжа, хьабеш бола болх лерттIа бе беза.
