Skip to main content

Дешархой хьаькъал тахкар

Школашка экзамен дIаялара ха тIакхоачаш кийчо еш ба

Укх тIехьарча хана школашка а царел арахьа а каст-каста хоз ВПР яха дош. Из вай вахара юкъеденад 2015 шера, хIаьта 2016 шера денз, ерригача Россен дешархоша ду цу тайпара балхаш. Сенна эшаш да уж, малагIа декхар да цар кхоачашдер?

Цкъа-дале, берригача мехкарча бераша Iомаду хIама цхьатара хилар (дешара стандарташ) чIоагIъю цар, шозлагIа-дале, дешархой хьаькъалаш малагIча боарам тIа да тоахк. Цу тайпара болх беш ба юкъерча школашка санна, ийс шера дешача школашка а. Цига дешархошта фу хов хьож математиках, химех, эрсий меттах, физиках, биологех, обществознанех. ХIаьта май бетта экзамена хьисапе царна ховр тохк гIалгIай меттах, литературах. Карарча хана из болх, дIаболабаь, беш ба вай республикерча школашка. ВПР хилар, дукха йоацаш, Сурхо тIарча ООШ оалача ийс шера дешача школе. Эрсий меттахи литературахи дола декхараш царна мишта довз, царех фу дувцалу хьежар шин классе. ИйслагIа классаш укхаза шиъ мара яц. Хьехархой Евлоев Мухьмада Мареми Дударов БайIаьлий Радимхани бар дешархоша цу гIулакха мишта кийчо яьй хьожаш хиннараш.

Ишттача балха юкъе дакъа лоаца бераш довзаш хила деза чоалхнеча предложеней тайпаш, предложенена синтаксически тохкам бе, дешашта морфемни, фонетически, морфологически тохкамаш де, дешашцара юкъедита алапаш нийса Iоувттаде, кхыдола декхараш.

Биологех ха деза сагаца, кхыча дийнаташца, баьцовгIашца дувзаденна дешаш. Физиках довза деза Iилма Iомадеш леладаь дешаш, цар белгалду гIирсаш, токаца ювзаенна моттигаш, бе-бе законаш, кхы дIахо а.

Лакхе хьоахаяьча классашка да дешарах дика лоархIадеш дола бераш. Масала, царех я Булгучева Iайна, Точиева Зубайдат, Аушева Мадина, Булгучев Мухарбик, Точиева Дали, Аушева Милана, Измайлов Мухьмад, кхыбараш. Уж а цар новкъостий а аьттув баргба аьнна хет тайп-тайпарча Iилмаех дола лакхара хьокхамаш гойта.

Къаьстта ала лов гIалгIай меттах лаьца. Укхаза хьалха дIаихача шерашка цар жоп дала дийзад меттаца а литератураца а дувзденнача хаттарашта (тесташта), цул совгIа зIамига сочинени язъе йийзай белггаларча темах лаьца. Наггахьарча сага мара кхоъ ца йоаккхаш, из болх дика кхоачашбаьбар цар. Иштта хургда аьнна хет сона укх шера а. Цунга кийчлуш, хила тарлуча хаттарашта жоп луш, къахьега дезаргда дешархой дIайолалуча йиълагIча четверте.

ВПР йолаш доккхий хьаькъалаш гойтарга хьежжа хургда цар дIахора дешар а вахар а. Цудухьа цар аьттув балар а, вахаре шоаш эшаш болча моттигашка уж дIанийсбалар а лов.