Skip to main content

Хала лазараш ханнахьа гучадахарахи дарба дарахи дийцар, республика парламенте

Социальни политикахи унахцIенохи йолча комитета кулгалхо волча Горчхананаькъан Беслана кулгалдеш, йоккха кхетаче дIайихьар вай парламенте. Дакъа лоацаш хиннараш бар: «Фенилкетонурия долча унахой гуллама» президент йола Балабанова Елена, «Дом редких» яхача правленен кулгалду Татарникова Анастасия, «ЗIамигабоаца нах» яхача кхуврча хьалхле лелаю Нестерова Юля, дерригача къамий фармкхоачам кхоллаш йолча ассоциацен кулгалду Миронов Роман.

Депутаташа дакъа лацарал совгIа, вайцигара цига бар: бералли ноаналли гIулакха болча кхуврча кулгалхо Манкенаькъан Лариса, унахцIенон министерства керттера генетик йола ГIантамаранаькъан Мадина, керттера кардиолог Колой Хадишат, ИРО ВПП «Единая Россия» совета оагIон хьалха латта, Бекмарзанаькъан Мухьмад. Кхетаче дувца оттадаь керттера дош — халачарех лоархIаш дола лазараш ханнахьа, юхьанца дIадолалуча хана гучадахар, доагIаш дола дарба ханнахьа дIадоладар, иштта, эшаш йола дукха мах бола молхаш Iалашъяр.

Дийцар, депутатски корпус, шийна могачох, цу хIаман тIехьа гIо де лаьрхIа йолга. «Парламенте, из гIулакх керте оттадаь, цун тIахьожам беш хургба. ГIулакх аттадарех дац, цунга хьежжа, хила боагIаш бола теркам а беш из дIадахьар, тахан, эггара лоархIамечарех да. Бераш-вай массане кхоане я, беррига низ, тахан, уж могаш халийтара тIехьа дIабала беза вай. Вай дерригаш цхьана оарцагIдовла дезаш хьал да из!», — аьлар Горчхананаькъан Беслана.