Skip to main content

Халкъа поэта 105 шу дизарга

Яндиев Хамарзий Жамалдин

ГIалгIай мотт мел ховча сага дика довзаш да Яндиев Хамарзий Жамалдий байтий лергдоаца мугIараш. Укх шера 105 шу дуз гIалгIай лоаман юрта Балте, мугIарерча ахархочун дезале из малхаваьлча денз. ЗIамига волаш нана енна виса кIаьнк хьалкхийнав даьца, даь-наьнаца, даь-сесагаца.

Цу наха Iомабаьб цунна, цун ший дешашца аьлча, «шакIа санна цIена мотт». Школе дешаш, цигарча библиотекера дикагIа мел дола книжка довза гIерташ, хьавенав хургвола поэт. ХIаьта а цо хержа дешар литератураца дувзаденна хиннадац, технически балха говзал хиннай цо караерзаяьр. Буро тIарча индустриально-педагогически техникуме дешаш хиннав Жамалда, школа яьккхачул тIехьагIа. Цига деша дIаотташ, поэт санна вовзаш хиннавац из, бакъда техникум яьккха воалача хана, тIоа сегача санна ека яьнна цун байташ гIалгIашта сиха дIаяйзай. Цу хана денз, къоалам Iо ца буллаш, ше валлалца йолча ханага кхаччалца къаман литературан сий доаккхаш, из дIаьхийгIа хулийташ, хьавенав Яндиев.

Сона чIоагIа хоза хийтар цхьан телепередачанна юкъе Чахкиев СаIида цох аьнна дешаш. «Жамалдах доацараш дувца дезац, долашдар дийцача а кхоачам болаш саг вар из», — аьлар цо. Из нийса а да, хIана аьлча дIаьхий, хьаьнала вахар долаш, цIена ваьха саг хиннав Хамарзий Жамалда.

Духхьала ший байташ язъяь ца Iеш, говза таржамхо а хиннав вай мехкахо. Цкъаза цо даь таржам дукхагIа дезалу автора ший меттала даьча йоазонал а. Цу тайпара да Лермонтов Михаила «Сагота я, сахьувз» яхача стихотворенецара ер мугIараш:
«Сагота я, сахьувз, дег тIа бала беча,
Кулг кховдо саг а вац воалаш...
Безам... Фу пайда ба безам хилча?
Шераш дIаух — дикагIдола шераш...»