Skip to main content

Хий лоаттадеча моттигий хьал дийцар парламенте

Республикерча юрташка, шахьарашка хий цIендеча моттигий хьал дувцаш йола кхетаче дIайихьар хьакимаша.

Цунна юкъе дакъа лоацаш хиннараш бар экономически политиках йолча комитета кулгалхо Боканаькъан ИбрахIим, вице-спикер Пхьаранаькъан Руслан, парламента депутаташ, Наьсарерча, ГIаьзе-Коарча администрацей болхлой: Бохтаранаькъан Ювсап, Къамурзой Адам.

«Кхетаче дийцар, республике хий лоаттадеча моттигий хьалах. ДукхагIча даькъе из дувзаденна дар Аьлтий-Юртарча хий цIендеш йолча моттига гIулакхаца», — йоах хоамо. «Хицара кхоачамбоацараш тахан вай республике дуккхача моттигашка латт. БоаггIача боараме хий хьадоагIаш цахиларах, халонаш лов наха, лерттIа дIабодац канализаце болх», — белгалдир Боканаькъан ИбрахIима.

Къамурзой Адама яхачох, ГIаьзе-Коара нах массахана леткъаш ба, канализацешкара хьайоагIача хьажо сатем боабаьб, яхаш. Энергетикахи коммунальни боахамахи волча министра гIончас ГIайтакханаькъан Тимура белгалдир, из хьал тахан иштта латтара бахьан цу моттигашта шоай боарама хила безачул чIоагIагIа низ тIалаттар, уж моттигаш хьоггехь тоае езача кхаьча хилар да, аьнна.

Хин гIулакхах цаI волча оператора балхага хьожаш волча Курсайнаькъан Мусас яхачох, республикан водоканало йиъ насос хийцай, компрессораш тоаяьй, бакъда, чакхдоала хиш сов дукха хиларах, уж хIамаш йоккха юкъ ялалехь юха а йох. «Цу гIулакха тIахьожаш болча наха яхачох, шоай болх боаггIача боараме ца лелабеш болча цигарча болхлошта, уж бехктокхаме озаш, тIахьожам лоаттабу. Иштта прокурорски тохкамо гучадаьккхар, Наьсарерча районни дарбанче из гIулакх хила доаггIача беса дIахьош цахилар», — йоах хоамо.

Кхетаче гулбеннараша соцам бир, Аьлтий-Юртара хицара моттиг эггара хьалхарча аргIагIа тоае езарех я, аьнна. Таханарча дийнахьа хиш Iовш йолча моттигашкара хьаж йоаю, цу гIулакха йолча бактерешца. Гулбеннараша дийцар; Iалама, наьха унахцIенон зе дергдоацаш; из хьал ма хулла сихагIа, дикагIа тоаде деза, аьнна.