Skip to main content

Хьонк гулберашка, лоралуш хила аьнна, кхайкарал даьд ГIалгIайчен МЧС болхлоша

ЛоархIаме дарашта юкъе, массе хана а, ший лакха моттиг дIалаьца лаьттад хьонк гулбара гIулакх. Укх шера, хьалхарча деношка денза, базар тIа дохкаш да из хами махи баь варгвоаца доккха беркат.

ХIаьтта хьабаьннача хана, цун мах 1000 сомага кхоачаш лакха хуле а, хьонк ийбераш дукха хул. Вайна, даьй хана денза, ховш да хьонк геттара чIоагIа дарбане болга. Дуккхача лазарашта духьала отта низ бола из баьца даар, Россе бахача, шоай бовзарашта, безарашта дIабохьийт наха.

ХIаьта, из гулбара болх мел хала ба ховргдац, из леладечун мара. Iан деной шелал юаш, лай кIалара из хьабахабезарал совгIа, хьунагIа лела кхераме а я. Дуккха моттигаш хинний, хьонк гулбеш лелараш, кIоаргга хьун юкъе дIачубахий, тувлалуш, лазар лоацаш.

Цудухьа кхайкарал ду, МЧС болхлоша, лоралуш хилара нах тIахьехаш. ХьунагIа водачо, шийца хьаэца деза — дIайха барзкъаш, цIилеторгаш, компас, телефон. Цул совгIа, хьунагIа бийсаш йоаха гIулакх а дIадаккха деза.

МЧС болхлошкеи цIагIарбарашкеи хоам бе беза, ше хьонк гулбе лаьрхIача доазонах.