Кхааш ийдара, бокъо йоаца ахча ший доалахьа дерзадара духьала йола аргIанара кхетаче дIайихьар цу гIулакха духьала тIом лоаттабеча комиссе, МагIалбик-Шахаьара хьакима Галай Мусас кулгал деш.
«Укх бетта 23-ча дийнахьа шахьара администраце дIадихьача вIашагIкхетаре къамаьл дир бокъоний оагIон кулгал деш йолча Муружанаькъан Зинас, цу балха тIахьожам беш йолча Кхоартой Сапета, шахьара кулгалхочун гIонча волча КIориганаькъан Мухьмада. Кхетаче дийцар, 2023-ча шера, кхааш ийдеча, бокъо йоацаш ахча доаладерзадеча гIулакха духьала дIабахьа безача балхах. Галай Мусас белгалдир, из гIулакх лакха тIахьожам лоаттабеш, бехктокхаме дIадахьа дезилга.
Цу мугIаре нийсбеннача кхерам болча болхлоша хIара бетта хьаийдеча ахчах хоам беш дола каьхат ший истола тIа хилийта, аьлар Галай Мусас», — дийцар тха газетага МагIалбикерча хьакимаша. «Бокъо йоацаш Iаьдала ахча карадерзадар тахан даьржа да, цунга хьежжа, лакха терко еш дIабахьа лерхI оаха из болх», — аьлар Кхоартой Сапета.
