Skip to main content

Кхоана ший наIараш хьаелларгья ГIалгIай Паччахьалкхен исбахьален искусства музея

Паччахьалкхен Музее хьоашалха бех вай мехкахой

Кхоана, Россе ди долаш, ГIалгIай Республика Паччахьалкхен исбахьален искусства музея болхлоша безам бараш берригаш а хьоашалха бех, мах боацаш шоай гойтама залаш дIахьокха а иштта шоай балхах а тамашийнача экспонатех дувца а. Iуйрийна денз, сарралца укхаза наIараш йийлла хургъя.

— Россе Ди хьатIадоагIаш хиларца дувзаденна оаха лаьрхIад вай мехкахошта тхоай экспонаташ гойта, — аьлар «Сердало» газетага Паччахьалкхен исбахьален искусства музея кулгалхочо ТIумхой Любас. — Из акци дIахьош хиларца хIаране таро хургъя мах боацаш музея къаман ганз бIаргаго, иштта ГIалгIайчен мах бараш довза.

Сона хетачох, наьха безам дукхагIа тIагIоргба декоративно-прикладной искусства «Ингушетия мастеровая» яхача оагIонна, иштта ГIалгIай паччахьалкхе юхаметтаоттаяь хилара Денна хетаяьча «Родины яркие уголки» яхача живописа, графика музея фонда. Цул совгIа го йиш я Буружанаькъан Iайнай, Кхоартой Батыра «Мои впечатления в красках», «Монолог о земле родной» яха выставкаш.