Skip to main content

Цар къоастам баьб шоаш хьаэцаргьйолча профессен

«Кхоанарча вахаре билет» яхача проекте дакъа лацаро шоашта беннача аьттонах, дувц вай мехкарча дешархоша

Дешара шу дIадоладелча юкъе а яьккха, ший болх дIахьош я «Кхоанарча вахаре билет» яха, лоархIаме проект. Хьалха тха газета яздаьдар, цу программа юкъе регионера кхо эзар бер да аьнна, хIаьта, керда хьехархой — навигатораш (60 совгIа саг) профориентологехи,  профориентационни тохкамах дараши, тематически дешара пособешца дувзаденнараши- Iомадеш ба. Из деррига царна эшаргда, дIахо проект йоаржаяра тIехьа. ЦМИТ «Реновация» яха кхуврч ба, проекта региональни оператор хинна латтар. РФ просвещени министерства я, из беркате проект хьакхолла, эггара хьалха дагадехар. Проекта оператор — Есин Ивана кулгалду, гуманитарни проектай фонд. «Кхоанарча вахаре билет» яха проект, Россе президента, Путин Владимира чIоагIонца дIахьош я. «ХIара бера аьттув» яхача федеральни проекте, «Дешар» яхача къаман проекте чубодаш ба из болх.

ДIадахача шера проекте дакъа лоацаш хилар 1,2 эзар дешархой«, — дийцар республикерча дешарахи Iилмахи йолча министерстве. Цу проекте дакъа лацаро берашта малагIа пайда беннаб, тахка лаьрхIар оаха. Цар дийца цхьаццадараш, тахан, газет дешарашта довзийта лов тхона. «Сога хаьттача, из проект, таханарча дийнахьа, геттара эшаш, лоархIаме я. МоллагIа дола хIама хьай бIаргашта гуш хьакхоллаш хилар, дег чу дукха хIама сомадоаккхаш да. Из проект бахьан долаш, тхона яйзай дуккха профессеш, хьалха вIалла довзаш ца хинна гIулакхаш, шоаш ма дарра, довза аьттув хилар. Из бахьан долаш хургьйола професси хьахаржа тхона аттагIа да», — дийцар Назранерча №4 йолча ишкола дешархочо Толднаькъан Венера.

«Проекто сона гIо дир хургьйола професси хьахоржаш. Цу юкъе дакъа лацар сона геттара эшаш дар, хIана аьлча, айса малагIа професси хержача дикагIа хургда ца ховш, шин гIулакха юкъе къоастам баь цаI хьахаржа ца могаш кхестар со. Тесташ яйзача тIадам оттабир аз цу гIулакха тIехьа. ВIалла шеко а йоацаш хов сона хIанз, къаьстта сайна беркатегIа, дикагIа малагIа професси хургья. Аз доккха баркал оал из проект хьакхоллаш къахьийгарашта», — аьлар тха газетага Шолжа-пхьерча №1 йолча ишкола дешархочо Льянанаькъан Алифас. Эггара чIоагIагIа ший вахаре шийна дагадаьллачун тIехьа къоастам бе аьттув белар цу проекто Эбарг-Юртарча №4 йолча ишколе дешаш йолча Хашенаькъан Хаьдена.

«Информационни технологешцара гIулакх дезаделар сона яхаш дувц дешархочо. ГIалгIай мехкарча команда юкъе йолаш со кхаьчар ерригача Россе просветительски ловзарашка ВДНХ, Москве. Из дар, бекарг бетта 17-ча, 18-ча деношка. Тха команада белгалъйир, Къилбаседа Кавказа регионашта юкъера, эггара дикагIчарех я аьнна. Россе моллагIа йолча пхье даха йиш йолаш, путевкаш елар тхона. «Кхоанарча вхаре билет» яхача проекто дог ураоттадир са. Аз кхетадир, дIахо йодача хана хоржаш йола професси информационни технологешца ювзаенна хила езалга. Из гIулакх дар сона чIоагIа дезаденнар». «Професси харжар дешархочун ший безамга, цун дикагIа хетачунга хьежжа хила деза. Ший дего къоабалдеш дола хIама да саго хьаэца дезар. ХIаьта ер проект ший ханнахьа тхона кхаьча новкъостал да. ХIара дешархочун аьттув ба нийсача наькъа тIа вала, шийна дикагIа лелалургдар харжа. Тахан дукхагIабараша професси хоржаш дола гIулакх «са да лор ва, сох а лор хила веза» яхача оагIонца соцам беш хул. «Кхоанарча вахаре билет» яхача проекте гIолла, са дуккхача новкъосташа, шоаш хержаб шоашта дикагIа хургбола никъ. Сога хаьттача, хIара дешархочо ше хоржам бе безаш гIулакх да из», — аьлар Хьулхой Дале.

«Моажала бетта, проекта доакъашхошта юкъе, цар профессиональни начIал гучадоаккхаш бола болх дIахьоргба. Берашта, ма дарра, йовзаргья хIара профессен оагIонаш. Шоай кулгашца цхьацца хьаде эттача, дикагIа аьттув хургба цар хургьйола професси харжа. Хьалха латтараша тела заданеш кхоачашдеш дIахьоргба цар из болх. Массала- ший кулгашца коч тега аьттув хургба, ЗD принтер чура макет арайоаккхаргья, иштта, Iомалургба программа код оттае, ший тайпара хоза даар кийчъде. Из деррига йисте даьлча, дешархошта хьалхадоаккхаргда, тIехьагIа беркате хургдолаш, профессен юхьиг мишта дIайолае еза. МоллагIа йола професси аьттув бахьаш хила еза!» -аьлар тха газетага республикерча дешареи Iилманеи министерстве.