Skip to main content

Лорий Iилманга баьккха хьалхара гIа

Албогачиев Шимоахий Руслан

Республике а цул арахьа а дика вовзаш ва лор-хирург, Iилманхо, журналист Албогачиев Шимоахий Руслан. Iилманхо яха дош цун цIера юхе увттаду, из медицински Iилмай кандидат хилар бахьан долаш. Ший вахар Iилманца дувзаде лаьрхIа ше волга Руслана хьахайтар 30 шу хьалха, 1991-ча шера кепа техар цо ший кандидата диссертаци хила езаш йолча автореферата.

Цу балхах хайра цунца деша баьгIача а цун къамах болча а наха, Албогачиев доккхача Iилман новкъа вала безам болаш волга. Кхы а шу даьлча, Ростоверча Халкъий доттагIала орден лелаеча Ростоверча медицински институте вIашагIкхийттача лаьрххIача Совета ладийгIар цун балха чулоацамга, цох бала тарлуча пайданга. Цу хана денз, медицински Iилмай кандидат волаш хьавоагIа вай мехкахо.

Цун Iилман кулгалхо хиннав медицински Iилмай доктор А. Шапошников, Iилман хьехамаш деш хиннай биологически Iилмай кандидат Н. Пушкина, Iилман болх могабеш хиннарашта юкъе ба медицински Iилмай доктораш В. Нефёдов, В. Авакимян.

Шимоахий Руслана диссертаци хетаяь хиннай холестерино хьедеча лазарашта. Вешта аьлча, симаца дувзаденна цамагараш хиннад цо тохкаш хиннараш. Ховш ма хиллара холестирино хьоаде тарлу IажагIа лазар, сима чухьа кхерилгаш кхоллаш нийслу, кхы а массагIа да уж.