Skip to main content

Ашархой а суртанчий а школа тоае йолаяьй

Маца чугIоргда бераш шоай керттерча фусаме?

Школа искусств г. Назрань

Укх шера 25 шу дуз Наьсарера искусствай школа хьаяь. Хьалха, вай Сибрера цIадаьхкачул тIехьагIа яь хиннар, хIирашкахьара беха Iобаьхка нах бахаш лаьттар цхьан юкъа. Цул тIехьагIа берашка дешийта, цу чу болх бе пайдана йоацача кхаьчаяр из. Дахчах яь, тIехнахьа ардакх тIатеха, баьццара басар хьекха яр къаьнара школа. Дукха пианисташ, пандарчаш, дахчан пандар локха бераш кхедаьдар цун тхов кIалха. Цу чу деша дIаболабенна бар вай таханара композитораш Шадажнаькъан Фариза, Малсагнаькъан Зарема, культуран министра заместитель йола Ильясанаькъан (Мусенаькъан) Iайна, кхы дуккхабараш. 1996-ча шера, из дIа а яьккха, цига хьалъяьяр цхьа гIат дола кирпишкий школа. Вешта аьлча, 16-ча сентябре нийсса ткъаь пхиъ шу дуз из хьайийлла. Цу хана республика хала йоаллар, эшараш-доацараш дукха дар; из бахьан долаш сиха а талмаста а яьяр из. Карарча хана, цун куц-сибат эргадаккха лаьрхIад культуран министерствос. Из болх чубоагIаш ба «Культура» яхача Россе халкъа проектá. Школан тIера тхов хьалъийцаб, кораш-наIараш хьадаьхад. Из болх дIаболабаьб август бутт болалуш.

-Тоаяь яьлча, масса гIат долаш хургья из? — хаьттар аз министра заместителга Ильясанаькъан Заьудина Iайнайга.

-Ше хиннача беса, цхьа гIат долаш, хургья, — аьлар цо. Иштта цо аьннадале а, из кIеззига хьаллакхъярга сатувса безам ба, хIана аьлча таханарча заманга диллача, отарашта таралестар цун цIа.

Цул совгIа, са къамаьл хилар школан директорца Медарнаькъан Iаьлий Маринайца. Цо яхачох, гIишлонхошта декхар тIадиллад, 1-гIа декабрь хьатIакхоачаш школа тоаяь яккха аьнна. Цу гIулакха кIезигагIа дале, 18 миллион сом ахча эшаргда яхаш да укхаза дувцар. ХIанзарчоа бераш декъаденна дешаш хургда «ГIалгIайче» яхача халхара ансамбла цIагIа, лаьрххIа цу гIулакха лаьцача квартире. Иштта къона суртанчий дешар а юкъахдусаргдац, царна деша моттиг а Iалашъергья школа тоаяь яллалца.

Теша безам ба, ашарий школера пианисташ, пандарчаш, гитаристаш, халхарчаш, иллиалархой (ерригаш пхи класс) кастта шоай хоза, сийрда, паргIата тхов-кIийле йолаш хургхиларах.