Ший хозача бесаца МагIалбикерча урамий куц тоадергда павлония яхача гаьнаша.
Императорски га оалаш йолча цун из цIи енний Павловий Анна яхаш хиннача императора йиIий сийна. Уж геттара сиха дегI дахьаш йола гаьнаш пхьерча администрацен болхлоша дIаегIай дагалоаттама сквере.
Хозача зизашца массане бIарг тIаозаш йола катальпаш МагIалбика шоллагIча микрорайоне дIаегIар. «Тайп-тайпарча гаьнашца пхье куц тоадара гIулакх дIахьош да Мехкдаь Келматнаькъан Махьмуд-Iаьла чIоагIонца.
Республика кулгалхо ше тIа а волаш керда гаьнаш дIаегIар дукха ха йоацаш тоабаьча Херсонская оалача ураме. Из беркате никъ дIахо хьош ба пхье моттиг тоаеш. Керда гаьнаш хоза тов миччахьа а. Ахкан хана геттара а хоза бос лургба цар. Иштта дIахьоча акцеша наха юкъера барт-безам чIоагIбу».
