Skip to main content

Марха тIера закят

Укх деношка чакхбоалаш ба Везача Дала безбаь байта параза Мархий бутт. Массане а Дала къоабал долда кхаьба марха, хьийга хало маьл язъяйойла, дехка а даста а ди а ха а маьрша йоагIийла вайна.

Тха къамаьл хилар дийшача Iалам-сагаца Нальгиев Алиханац.

Тахан вай дувцаргда мархий сахьах лаьцаи из мишта доаккхийи.

Пайхамаро (Даьлагара салам-моаршал хилда цунна) марха тIера загат далар важап даьд, Закяту фитр оал цох (мархий сахь). Саго марха кхаьбачул тIехьагIа из лаьттанеи сигалаи юкъе латташ хул, хIаьта цунна тIера мархий сахь даьккхача мара сигала хьал а додац из, Дала къоабал а диц из.

Мархий сахь тIадожар да хIара сага, мархий бутт хьалаьцача, дийнахьа денз. Цхьабакъда, массарел а дезагIа да мархий бутт чакхбаьнна Iийда де вахалехьа из даьккха а даьккха доагIача дIаделча.

Нагахьа санна, Iийда даьчул тIехьагIа, марха даьстача шоллагIча дийнахьа дIалой хьарам лаьрхIа да из. Iийда даьчул тIехьагIа, е цхьа ди даьлча дIа ца луш декхаш дIадала дезаш тIадуж сага.

Вай масхьабаха ахча дала бокъо йолаш дац вай мархий сахьана лаьрхIа. кIа мара дала йиш яц. ХIана аьлча, тахан вай мехка бахача наха юар дукхагIча даькъе маькх я цудухьа кIа дала декхарийла да вай мархий сахьашта лаьрхIа.

Мархий сахьа боарам 4 мут я уж гIалгIай IаьдалагIа аьлча, нагахьа санна кIа цIена хилча, ши кийлеи йиъ бIаь грамми (2 кг.400 г.) кIа бIеха хуле кхо-йиъ бIаь грамм IотIатоха бокъо я.

— Мархий бутт чакхбоалача дийнахьа Даьла кхеле дIавийрзача сага тIера мархий сахь даккха бокъо йий?

Кхоана Iийда ду яхаш, малх чубизачул тIехьагIа веннача сага тIера мархий сахь даккха деза. малх чубизалехьа веннача сага тIера даккха дезац.

— ТIаккха нагахьа санна мархий бутт чакхбоалача дийнахьа даь бер хуле цунна тIера мархий сахь даккха дезий?

— Кхоана Iийда ду яхача дийнахьа малх чубизалехьа бер дой цунна тIера мархий сахь даккха деза. малх чубизачул тIехьагIа дой цунна тIера даккха дезац.

— Дезала юкъе мархий сахь эггара хьалха хьанна тIера даккха деза?

— Эггара хьалха хьайна тIера даккха деза, тIаккха хьай сесага тIера даккха деза. ДIахо зIамагIа волча дезалхочун тIера, тIаккха даьнеи наннеи тIера доаккх, дIахо воккхагIа волча дезалхочун тIера.

Шийна тIера доаккхаш хилча: аз нигат дир сайна тIера параза мархий сахь даккха. Масала, сесага тIера мархий сахь доаккхаш хилча:

Хьайна тIера параза мархий сахьа даккха со викал варий Iа? — ала деза.

Цо вир аьнна, ше аьлча, ший дагахьа ният де деза сесаго. Сайна тIера параз мархий сахь даккха викал вир аз хьо, аьнна.

ТIаккха сесага цIи а яьккха, цунна тIера ер мархий сахь даккха воал со аьнна, хьадаккха деза мархий сахь.

— ЗIамагI волча дезалхочунгара мархий сахь даккхара пурам эший?

— Пхийтта шу даьнна из веце, цунгара пурам даккха дезаш дац.

Цо ала деза, хьайна тIера мархий сахь даккха со викал варий Iа, вир, аьнна жоп дала мара дезац.

— Мархий сахь мичахьа дIадала мегаш да, из дIалуча хана малагIа ният, хьангара пурам даьккха дала деза?

— Закат доагIача наха мара из дIадала йиш яц. Хьо вахаш йолча юрта цу тайпара нах бола а болаш кхыча юрта ваха из закат дIадала бокъо йолаш вац хьо.

ДIалуча хана: «ер са параза, мархий сахь да», ала деза. Мархий сахь дIадала водачо. «Шоай параза мархий сахь дIадала со викал варий оаш?» аьнна.

ХIаьта дезала «оаха викал вар хьо» ала деза.

— Мархий сахь цхьаннахьа делча мегаш дий?

— Цхьан коа, цхьан цIагIа пхиъ-ялх саг къе боахкаш, нах хуле царна дIадала, мегаргда мархий сахь, нагахьа санна мархий сахь дукха хуле кхаьннахьа далар дикагIа да. ДIалучо: «Ер са параза мархий сахь да хьона» ала деза. ДIаэцачо къоабал а даь из дIаэца деза.

Дала Ше укх безача мархий бетта леладаь хоза гIулакхаш, дIахо дIа мел йодача хана а леладе низ лолба вайна.

Дала хьарамча хIаманна гаьна доахалда вай. Дала хьаьнала даьча хIаманна тIехьа сутара хилда вай.

Дала Ше марха къоабал а долда вай бусалба вежарий, южарий!