Skip to main content

МЧС болхлой, берий салоIама лагерешка, кхетачеш дIакхухьаш ба

Бераш салоIаш долча лагерешка ухаш, цар кхерамзле лораяра тIехьа дараш доаржадеш ба МЧС болхлой. ЦIаьхха цIерацара хатар иккха моттиг хуле, де дазар хьалха доаккхаш ба уж лагерешка.

Эбарг-Юртарча, Комаро оалача, лагере шоай болх дIахьош хилар уж укх деношка. ЦIера тIахьожамах волча инспектора, Дударанаькъан ИбрахIима, дийцар берашта, цIерах лоравалар мишта хила деза. Хьалхадаьккхар, салоIаш ара багIача хана йиза цIи, нийсса мишта дIайоае еза, цIаьхха эшаш моттиг хуле, цIи йоаеча баллонаца болх мишта бе беза. Из деррига берашта хьалхадаьккхачул тIехьагIа, дIайихьар учебни эвакуаци.

«Уж тайпара кхетачеш, ерригача лагерешка, хIара сменаца дIакхухь оаха. Бера а воккхачун а довза деза цIера духьала де дезараш. ДукхагIа йолча моттигашка, цIи яьнначул тIехьагIа доккхий зенаш хилар, наха шоай фу де деза ца харца дувзаденна да. ЦIи яьлча корзагIваьнна ца хьовзаш, сихагIа, нийсагIа из хатар юстара доаккхаргдар дикка довзаш хила веза хIара вар. Из болх оаха дIахьоргба массе кхуврчашка», - аьлар цIера тIахьожам беча инспектора.