Физико-математически Iилмай доктор, МФТИ теоретически физиках йолча кафедра кулгал деш вола Ахмедов Эмиль, вай дешара моттигашка лекцеш ешаш хургва.
«Квантови теоре тамашаш» яхача темах лекцеш ешаш ва Москвера вена профессор. Укх бетта 16-ча дийнахьа «Кванториум» яхача берий технопарке болх дIахьош хилар из. Цу кхетаче профессора дийцар Ньютона гучадаьккхарех, квантови компьютерий балхах, иштта кхыдарех.
Ше дувцар кагирхоша дикагIа дIаэцаргдолча тайпара, кердадараш юкъекхувлаш дIайихьар лекци воккхача профессора. Магасерча паччахьалкхен университете физико-математически факультете дешаш болча студенташта лекци ешаш хургва хьаьша тахан. Иштта йола кхетаче дIахьоргья МагIалбикерча №2 йолча ишколе.
