Вай мехка хьалха а тахан а дика вовзача поэтех цаI ва Михалков Сергей Владимирович. ДукхагIа мел дола ший йоазош цо берашта лаьрхIа деш хиннад. Бакъда берригача мехка из везавала волавеннав Сталин паччахь волча хана. Цу хьакъехьа язъяь хинна статья йийшай аз газета тIара.
Михалковс цу заман чухьа язъяь хиннай «Светлана» яха стихотворени. Сталина йоI хиннай Светлана (Аллилуева) яхаш. Халкъий «даьна» езаеннай из байт, цудухьа цо лоархIаш, вовзаш, оагIув хьаллоацаш вола поэт хинна дIавахав Михалков. Сталин валале, СССР Паччахьалкхен преми кхозза енна хиннай цунна (1941, 1942, 1950) шерашка.
Берашта меттел, из дика вовз вай мехка мел бахача а доазол арахьарча а наха, хIана аьлча из ва Россе керттерча илле — гимна дешаш яздаь вола саг. Юххьанца из язъяь хиннай СССР гимн санна 1943 шера Гарольд Эль-Регистанаца цхьана, 1977 шера тоаяьй, хIаьта Россе гимн санна цо яздаь дешаш чIоагIдаьд 2021 шера.
Берашта из геттара везавалийтар да цун «Воти Стёпа» («Дядя Стёпа») яха книжка. Са ханарча берашта юкъе «воти Стёпа — милиционер» ца вовзаш саг вацар. Из геттара лакха воландаь, лакхача кIаьнкех Стёпа аьле цIи туллар, боккхагIчарех а оалар «из-м цхьа дядя Стёпа ма вий».
ДагадоагIа, цу тайпара виткъо лакха кIаьнк вагIар аз дийшача №1 йолча Наьсарерча ишколе, Бузуртанаькъан вар из. Массане а, ший цIи ца йоаккхаш, Стёпа оалар цох, цунна шийна а из цIи хоза хетар мотташ ва со. Книжкаш дешарашта карарча хана а сакъердаме хургда аьнна хет сона из йоазув.
Михалков Сергея миссел книжкаш арадийнна саг наггахьа хургвац Россе. Цо хьегача къин лакхара мах баьбар паччахьалкхено, Социалистически Къахьегама Турпал яха цIи, Ленински преми, диазза паччахьалкхен премеш а енна. Вай республикаца айхха бувзам болаш вар Михалков, хIана аьлча нохчаша, гIалгIаша шоай цIерагIа СССР Лакхехьарча Совета депутаталла хержавар из. Цунна дика бовзар вай йоазанхой: АхматовгIар Раиса, Янданаькъан Жамалда, Боканаькъан Ахьмад, Ведажанаькъан Ахьмад, Гаьгенаькъан Гирихан, кхыбараш.
Базорканаькъан Идриса хьакъехьа Тирканаькъан Iаддал-Салама дийца хIама дицлуц сона. Сергей Владимирович депутат волча хана, из вена хиннав Наьсаре. Цу вIашагIкхетара юкъе дакъа лоацаш хиннав наьсархо а. Iаддал-Салама хаьттад Михалковга, фу йоазанхо хет хьона Базорканаькъан Идрисах, аьнна. Вокхо жоп деннад: «Россе 8000 йоазанхо ва, Идрис царна юкъе Идрис ва. Аз аьннадар цунга, хьай политически уйлаш хувца. ЛадувгIанзар цо сога. ХIаьта а книжка шозлагIа арадаккха гIо дир аз цунна».
Ала деза, Михалков Сергей цIихезача кинорежиссёрий Михалков Никитай Кончаловский Андрея да ва, аьнна. Укхаза дагадох сона Никита Сергеевича телепередаче цкъа дийца хIама. ЗIамига волаш, даьца машена чу а вагIаш, хьавоагIача Никитас аьннад:
— Сона-м геттара хоза хетац хьа берий байташ.
— Хьайна уж хоза ца хете а, цар хье кхоабаш хиларах сий де дезар Iа цар, — аьннад дас. Дика дагадагIац сона, машена тIара Iоваьккхавар мотташ а ва со, Никита гIаш гIоргволаш. Байташ, кIоанолгаш хоза язйора аьнна хет сона Михалковс, из берригача мехка ховш а да. Цун байтех цаI «Лувжорг» («Каток») аз гIалгIай меттала яьккхай. Еш вай из:
«Лувжорг, лувжорг,
Даьннад къега,
Шедар даьд цо
Тахан кега:
Никъ, машенаш
Сувца майда.
Тормоз тохе,
Хилац пайда.
Мича вода
Хьо цу гIорах?
Арахьежаш
ВагIа корах!»
Кхелхав Сергей Владимирович 2009 шера, ший 96 шу даьннача хана.
