ГIалгIай Республикан Наьсарен шахьара Юбилейни оалача микрорайоне хьайийллай Тайп-тайпара балхаш деш йола центр, цо паччахьалкхен а доал деча даькъ тIарча администрацеца дувзаденна а дукха гIулакхаш чакхдаха таро хулийтаргья.
Хьалхара укхаза баьхкача наха мах бир, таханарча хано дIадеххача беса вIашагIъеллача МФЦ беш болча балха. ХьалхагIа из отдел федеральни наькъа йистте яр, цудухьа наха башха накъайоалаш а яцар, вахара-вара из моттиг атта цахиларах.
«ЦаI йолча Россе» моттигерча отделене секретара, ГIалгIай Республикан Халкъа Гуллама кулгалхочо ТIумхой Мухьмада из доазув тоаде, балха тIа доаггIача беса хьалаш хилийта, аьнна, тIадилла декхар кхоачашдеш, из гIишло шийна хьатIаийцар региона парламента единороссай фракце кулгалхо волча Аласхананаькъан Мухьмада. Мехка парламенте хоам баьча беса, из центр хьаеллар бахьан долаш, бахархой таро хургья шоаш цу МФЦ гIолла дIахьош бола каьхатий болх аттачабаккха, иштта, гаьна баха ца безаш, гонахьа бахача наьха а вIаштIехьадаргда сихха гIулакх чакхдаккха, къаьстта цу гонахьа бахача дукхача наьха.
Кердача офисе наьха таро хургья коммунальни, кхыдола гIулакхаш шоашта дарах бола Iаьдала мах дIабала. Цу гIулакха лаьрхIа мах дIабала йиш йола терминалаш оттаергья.
