Skip to main content

«Оаха вахар хорж» яха спортивни акцеш дIахьоргья Минспорта

«Оаха вахар хорж» яха спортивни акцеш дIахьош я, вай республике спортах йола Министерства. Из гIулакх вIашагIделлараша, укх бетта 25-ча, 26-ча дийнахьа наркоманен духьала тIом лоаттабеча ден хетаяь спортивни кхетачеш дIахьоргья республике.

Укх бетта 25-ча дийнахьа «Магас» яхача спорта цIагIа боккхийчарна юкъера волейболах йола республикански турнир дIахьоргья. Цу дийнахьа, Назранерча лицея доазон тIа, берашта юкъера футболах йола республикански турнир хургья. 26-ча дийнахьа «Магас» спорта цIагIа, юниорашта юкъера баскетболах йола турнир оттаргья.

Наркомани яха доккха зулам, тахан, вай массане дегашта йоккха чов хинна латтарех да. «Аптечни наркомани» яха хIама, вайна юкъе, ма даггара, даржаш латт. Дерригача къаман белаж тIа йоккха хало хинна IотIадижарех да из ийрча, унзара гIулакх. Цунга хьежжа, вай хIаране декхар да, ший низ дIа ма кхоачча, цу зулама духьала лира тIом лоаттабар. Дала гаьнадоаккхалда из ийрча гIулакх вай къаман!