Вай мохк дунен ийслагIа дакъа долча хана, геттара цIихеза дукха журналаш дар эрсий меттала арадувлаш, наха къаьстта дукха дезаш хиннарех дар «УнахцIено», «Нева», «Заманхо», «Ахархо», «Болхло», «Журналист», «Керда дуне», «Дон», иштта кхыдараш. Царна юкъе а белггала, лоархIаме моттиг дIалоацаш дар «Огонёк». Тамашийна хIама да, укх шера вай къаман «Сердало» газета а дуз 100 шу, цун ханара да дувцаш дола журнал а. «Огонёк» кхелла хиннад 1923 шера, хIаьта вайна ховш да-кх къаман газета хьалхара номер цу шера 1-ча мае араяьннилга. ЦIераш я цар вIаший тара, йоагача цIерилго а лу сердал, цул совгIа йIовхал а лу. Уж декхараш кхоачашдеш, наьха сапаргIатадоаккхаш, дуккха кердадар: политика, культура, литература — довзийташ хьаденад мехка гIордаьнна тептар.
Цун оагIонаш тIа йоазонна кепа тоха сел атта а дацар, хIана аьлча цун боарамга кхоачаш дика а наха дезалургдолаш а хила дезар цун оагIонаш тIа кепа тоха йоазув, вахарах-леларах из дале а, йоазанхой кхолламашца дувзаденна из дале а. ЗIамигача къамий викалашта къаьстта хала хулар цунга кхача, хIана аьлча йоккхийча 15 республиках лаьттача Советски Союзе дукха хIама дар цу тIа кепа тоха мегаргдолаш, цун оагIонаш мукъа ца юташ. ХIаьта а вай къаман цхьаццаболча викалий аьттув баьннабар наха чIоаггIа къердаш долча журналага гIолла шоаш дIабовзийта. Уж дуккха а хила тарлу, бакъда сона дагадоагIаш, цун оагIонаш тIа шозза мара гIалгIай къам довзийташ йоазош хиннадацар. Из дар 80-ча шерашка. Поэт Вешкаранаькъан Мухьмад Москве хиннача къонача йоазанхой ХVIII-ча кхетаче (цхьачар съезд а оалар цох) дакъа лаца вахавар. Цига вайзавар цунна эрсий поэт Чуев Феликс. Хетаргахьа, цун семинаре кхаьчавар Мухьмад, кхетаче йолча деношка. Цигара цIавена дукха ха ялале, Чуевс таржам даь гIалгIай поэта байташ араяьлар «Огонёк» яхача журнала тIа. Из, сога хаьттача, къонача поэта боккха толам бар.
Цу журнала вийца шоллагIа гIалгIа вар Гуцаранаькъан Саварбика Микаил. 2021 шера тов бетта араяьннача «Огонёк» журнала ялх оагIон тIа яр Бухаркова Ольгас цунгара ийца интервью. Цул совгIа, тептара мужалта тIа лаьттар а вай мехкахочун сурт дар. Журналага гIолла кхы дикагIа дIавайзар Саварбика Микаил, хIана аьлча, духхьал из ше вийца ца Iеш, цун даь-да, да, дезал, бизнесмена леладу балха гIулакх дийцадар цу тIа. Из журнал аз леладу 22 шу даьннад.
Цхьаькха цхьа моттиг йицлуц сона, цу журналаца ювзаенна. Шолжа-ГIалий тIа вахача хана, В. Ленина урами Пионерскибари вIашагIкхетача саьн тIа яр газеташи журналаши дохка киоск. ХIара Iуйрийна балха водаш, цу чу керда фуд хьеже мара водацар со. Киоска чу каст-каста хулар «Огонёк» яхача журнала юхедуллар (приложени), цун а яр журналаяр санна цIи. ТIаьръюкъ миссел мара доацача цу тIа каст-каста кепа еттар вай боккхача мехкарча дикагIболча йоазанхой кхолламашта: байташта, дувцарашта, и. кх. дI. Тетрадь мо диткъача цун хIара номер эца хьожар со, тIакхача вIаштIехьадаьлча. Са книжкашта юкъе латтар уж, дукха Iайнадар уж цу тархен тIа. Цхьан дийнахьа со волча хьоашалгIа баьхкача поэташта юкъе вар Вешкаранаькъан Мухьмад. Са книжкашка хьежаш лаьтта, аьлар цо:
— Сали, аз аьнна цхьа хIама лургдий Iа сона?
— Лургда, вIалла дала йиш йолаш дале-м? — жоп делар аз.
— «Огонёк» журнала юхедуллар да сона, — аьлар Мухьмада.
— Из хала де дезаш хIама дац, дIахьо, — аьлар аз.
Духхьал цхьан Мухьмада дезаденна а ца Iеш, дуккхача наха хоза хеташ, цар дешаш дар журнала юхедуллар.
Журнала хьабенар бIаьха никъ ба, 100 шу яхар бегаш бац. Цун журналистий аьттув балар лов, наха хоза хетаргдола йоазош кхолла.
