Skip to main content

Вахара хьисап — журналист

Профессе наькъ тIара ца йоалаш

ГIалгIай Республика Халкъа Гулламе 2019-ча шера денз парламента депутат йола Хашиева-Евлоева Аза яьй 1972-ча шера 2- ча октябре.

Цо дийшад Нохчий паччахьалкхен университета филологе факультете, иштта телерадиоболхлой говзал лакхъяра йола курсаш чакхъяьхай Москве.

ХIаьтта дийша яьнна къона болхло яр Йовлой Аза юххьанца из телевидене болх бе йолалуш. Из дар 1996 шу. Цул тIехьагIа дIа мел йода ха цо хетаю атта йоацача журналиста профессена. ХIанз-м тешшаме ала йиш я, уж деррига шераш профессе говзал лакхъеш, ший моттиг вахаре хьалоацаш дIадихьар цо, аьнна. Цу хана денз таханарча денга кхоачаш цIихеза журналист йолаш хьайоагIа из. Иштта лоархIаш я Аза коллективе, балха говзал йолаш, нахаца Iимерза, эшача гIулакха кийча йолаш из хиларах.

МоллагIвола саг балха бехктокхаме хилча, цунгара масал эцараш а хул. Аза царех я ала йиш я. Атта доацача даькъ тIа — телевидене продюсера болх каралаьца дукхача шерашка къахьегаш, моллагIдола тIадилла декхар кхоачашдара кийча йолаш из хилар бахьан долаш коллектива юкъе а ший моттиг хьалаьцай цо.

Из деррига чулоацаш да цунна дукхаза паччахьалкхен кулгалхоша баркал оалаш денна совгIаташ. Масала, из я ГIалгӏай Республика культура цIихеза болхло, цул совгIа, цунна баркал оалаш совгӏаташ тийннад Ерригроссийски паччахьалкхен телерадиокомпане (ВГТРК) кулгалхоша а, кхыча дуккхача вай мехкарча организацеш а.

Укхаза белгалдаккха деза, Азас цIаккха а аттагIа бола болх ца лийхалга. Из даим халагIча даькъ тIа къахьегаш хьаенарех я. Къаьстта из бахьан долаш дIачIоагӏъелар из ше хержача журналиста профессе а, ший вахаре а. Цхьа моллагIвола саг журналиста болх бе лоархIавергвоацаш ханаш яр уж. Судашка, бокъолораерий органашка чуувтташ низагIа еш репортажаш яр, наха юкъе доаржаш дола зулам юхатохара вай бахархой тIахьехаш. Масала: «Из зала суда», «Игла», «Криминальный канал», «С телекамерой по РИ» яха передачаш кийчъяьй Йовлой Азас. Журналист из хилар бахьан долаш цхьаболча наха кхерам тIатувсаш моттигаш а хиннай цун. Бакъда, кхераенна юха-м яьннаяц тахханалца.

Ше юххьанца балха мишта ера дувцаш, Азас йоах: «Даь-нана больнице уллаш тIехьадолхаш дар тхо са даьца. Телевидене юхе гIолла тхо тIехдовлаш цхьа объявлени йийшар аз. «Болхлой эш» аьнна яздаьдар. Аз сай даьга дехар дир, соцаел машен, дIачугIоргъяр со, аьнна. Эггара хьалха сона бIаргавайра цу хана телекомпане кулгалхо хинна Агасиев Къурейш. Болх безаш се еналга аз дӏааьлча, цо сога аьлар, «Нагахьа санна укх чу саг е лоархIа ца веш йола «Криминальни канал» яха передача Iа ергъяле, аз хьаэцаргъя хьо. Хьай хьашт дале, кхоана а араяла мегаргъя-хьона",- аьнна«.

Сайл дикагӏа кхычунга ца яйташ из е хьожаргъя со, аьнна жоп деннад Азас. Иштта дIа а яхар из, ше хьа мел дер тIехдика деш. Азас яь передачаш ютуб-канале гIолла го йиш я тахан а.

Эггара халагIа йола балха моттигаш ювцаш Азайна дагаух цхьа передача ше яь ха. Красноярскера ший даь-воша волча хьоашалха вена хиннав цхьа кхелета зIамига саг. Азас яхачох, Дзейтанаькъан вар из. Цхьа воча гIозарах дIа а кхийтта, кегавенна хьайзав из. Нанас оарц даьккха Iаьдала новкъосталца цIенах кхийтар из зIамига саг, яхаш дувц Азас. Цу хана хьунагIа съемочни тоабаца хьал чу ухаш, цу зIамигача сага нанна долча новкъостала къахьийгар Аза яр. ЦIихеза передача а хилар цох. Из зIамига саг хIанз ший дезал а болаш нийсача наькъ тIа ваьнна вахаш ва, — йоах Азас.

Журналиста болх безаш хиннай Аза ишколе ягIача хана а. ДукхагIа йола ишколера ха Астрахане дIаяхай цун. Цига вино-коньячни заводе Азай да Або балха хиларах, беррига дезал а цигача бахаш хиннаб.

Из бархIлагIча классе ягIача хана юха Кавказе баьхкаб уж. «ЧIоагIа сатувсар оаха зIамига долаш тхоай мехкага, — йоах цо. Аьхкий цIадахка ха кхаьчача гIаддолхар тхо, со а са зIамагIбола йижарий а вежарий а».

Ши вошеи кхо йишеи хиннаб уж.

Юххера а ший нанас аларах Азай да цIавоагIа ший мехка. Цу хана Шолжерча № 1 йолча ишколе деша йода из. Из яьккхачул тIехьагIа Шолжа-гIалий тIарча Паччахьалкхен университета филологе факультет йоаккх цо. Цул тIехьагIа из болх беш хиннай Шолжерча № 6 йолча ишколе хьехархо йолаш, цо иштта болх баьб библиотеке, Шолжерча администраце, юххера а телевидене кхаьчай из.

Вайх хIаранена санна ший тайпара вахара халонаш а нийсъенний цунна. ЦIаьхха венна Германера цIавахь Азай эггара хьамсарагIа вола воша. Цу хана из чIоагIа Iаьткъад цунна. Дукха ха ялалехьа метта висар да, Або а. Цунна уллув лаьттар Аза, вежарий арахьа хилар бахьан долаш деррига дукъ шийна хьатIа а ийца. Да воацаш а йисар йоккха юкъ ялалехьа.

Диъ бераца цхьаь йисар, эггара эшача хана кхел-рузкъа цIендаьцара хаьда хиларах. Бакъда, халонех къехкаш а кадаш а хиннаяц из цIаккха а. Берашта боаггIача бесса кхетам луш, царга дешийташ йоалл из. Азай йоккхагIйола йоI Iайна Москве юридически дешар дешаш я. Каст-каста йодаш, фу эш а мишта деш а хьожаш я Аза ший йиIий дешарга. Иштта Назранерча гимназе дешаш ба кIаьнкаш а, зIамагIйола йиIиг а.

Ший берашта кходаь хIама леладеш яц нана. Дуккхача кружокашка дIаязбаь, дешийташ йоал из ший дезалга. Шоай нанас дIахьийхар дIа а эцаш, иман долаш, дика дешаш, сабаре бераш да уж.

Цудухьа дукха хIама довзаш йолча Йовлой Азас наха а боккха пайда бергба, аьнна хет, хIана аьлча, дукхагIча даькъе цо социальни хаттарашта терко тIайохийташ хиларах.