Эккажкъонгий-Юртарча №3 йолча ишколе деша дагIача берашта кийчъяьяр, Наьсарен района культуран ЦIагIа «Дуне мел латта цхьа дезал болаш» яха литературно-ашарий композици. Из хетаяь яр ГIалгIайче Россех дIакхийтта 253 шу дизара, иштта ГIармеи Севастополь яха шахьари Россена чуйоагIаш хилара ийс шу дизара.
Из кхетаче дIахьош хиннача республикан культуран ЦIен исбахьален кулгалхо йолча КIуренаькъан Iайнас довзийтар; 5-6-ча классашка дагIача берашта ГIалгIайче Российски Федерацех дIакхетарах дола истори, цо иштта дийцар Гирма ах гIайре Россех хьакхетар мишта нийсделар а. Берий керттера терко тIаяхийтар паччахьалкхе чIоагIъяра укх массехк бIаьшерене а гIалгIай къамо дакъа юкъедена хилара, из дика гIулакх тахан а дIахохьош хилара.
Дешархоша шоаш а дийцар, гIалгIай къам Россех дIакхийттача хана денз, цунна мутIахьа долаш, Даьхен къонгаш, мехкарий хинна вай къаман нах хьабоагIаш хиларах. Даьхе лораяра массаза а хьалхарча мугIарашка латташ, из дегIайоалаяра къахьега кIаьд ца луш, вай хьадоагIаш хиларах лаьца.
Кхетаче цIихезача поэтий иллеш даьхар, иштта Россех, ГIалгIайченах лаьца иллеш а дар укхаза хаза йиш йолаш«,-аьлар «Сердало» газетага Наьсарен района культуран ЦIен кулгалхочо Дзейтанаькъан Тамерлана.
Цо яхачох, цу тайпара дIахьош йолча кхетаченах вай кхувш йоагIача тIехьено дика пайда эцаргба, шоай Даьхе езара наькъ тIа, иштта дикагIа довзаргда ГIалгIайчен истори, из кIоаргагIа Iомаде таро хургья цар.
