Skip to main content

«Са сесаг оапаш бувцаш я» яхача спектаклега хьажа бех бахархой, республикерча кагирхой театро

ХьатIадоагIача шоатта дийнахьа, гIалгIай паччахьалкхен кагирхой театро, «Са сесаг оапаш бувцаш я» яхача, спектаклега хьажа бех бахархой. Режиссер волаш болх дIабихьар ва республике цIихеза актер Льянанаькъан Ахьмад, хIаьта, американски драматурга язбаьча цу белха таржам даьр, къаман артист Зангенаькъан Руслан ва.

«Са сесаг оапаш бувцаш я» яхар, эксцентрически комеди я. Хоза, хьаькъале ма барра хьахьокх цу чу, цхьайолча хана, наха шошта балийна боаккха кхалнаьха, маIача наьха кхерам. Керттера турпалхой Вильями Кэттии яха мар, сесаг ба. Цар вахара хьал талхаш латт. Ший маьра доттагIчунца ресторане хIама дуаш яьгIа, тIаккха из марах къайла кхухьаш лел Кэтти. Дегабуам баь, хийрача маIача сагаца из хоенна Вильям, цIагIара дIавода.

Иштта цхьа дош доацар да аьнна хетача кхалсага оапаша, цIен юкъера барт бохабу. Фу даь из юхавоалавергва ца ховш, кертах ехий хьовз Кетти. Ший IаьдалагIа, мар чувоалаве а енна, кхы а боккхагIа оапаш бувц Кэтте», —  дийцар тха газетага театре. Дагадоацача тайпара дIадерзача гIулакхо, белам бергба хьажархошта. Шоатта ди, шоай дега салоIам беш, дIадахьа аьттув ба цар. Спектакль йолалургья нийсса пхи сахьат даьлча, Назранерча Культура цIагIа.