Skip to main content

Теркалде доагIараш тесса ма дита

Сага юхь цун гIулакхаша хьахьокх

ЦIагIара арадаьлча, воай кара хIама доацаш, дукха хIамаш зе дезаш хул вай... ХIаьта, цхьадараш-м хьо цецваккхарал совгIа, ванагIа, цхьаккха да вац хьогI, укх гIулакха тIахьожам беш аьнна, уйла яйташ хул. Хеталу, хургдацар-кх ер тайпара хIама, доал боаггIача боараме лоаттадеш, нахах, цар унахцIенонах дог лазаш, укх гIулакха тIахьожам лоаттабу нах хилча аьнна...

Вешта, тIахьожам яха дош-м укхаза вIалла а товш а хилац. Вайх хIаране зийна сурт да-кх, Назранерча базар тIа дIачуводача маькхи булкингаши, иштта кхыдола хьоара даараши дохкаш йола моттиг. Вай дерригаш а тахан базар тIа ухаш ма дий, цунга хьежжа, со хьоахае гIерта моттиг ца йовзаш а саг хургвац. Юхе гIолла тIехьваьнна атта дIавохалургвоацаш IотIахьежача хозеи, мерза чам сомабоаккхашеи хул тайп-тайпара булкингаш, массехк тайпара яь маькх.

Нах юхасувц эца безам болаш. Иштта сай тIорме чура бохча хьалдаьккха, сайна булкингаши маькхи эца чам чубенна дIатIаяхар со а. Бакъда, тIагIолла шекара дом тесса, меза мотт хьекха йолча булкингаш тIа, ма даггара ког хьокхаш, шоай болх беш дагIа доккхий мозий зийча, цецъяьннача йисар.

Ара хIанза а мозий даржа ха мича эттай вайна, бакъда, из ди дIайха хиларца цхьанахьара тIагулденнадар, цхьа моллагIа а доацаш геттара доккхий мозий. Из даар дохкаш латтача кхалсага дIабарахьежар, со тамаш еш... Бакъда, цун уж мозий говраш миссел дале а новкъа доацалгах кхийттар со. ХIана аьлча, кхыметтале кулг лостадаь а, тIера уж дIацалелхадеш латтар из!

Цу моттига, гаьна боацаш машенаш лела никъ ба. Кулекаш тIа доацаш латтача маькха, булкингашта IотIабижаций цар хьалгIеттабу дом?! Из дицдеш ба цхьаькха оагIув — хьатIа мел воагIа саг маькхаи булгингаштеи кулг тохаш, уж тIакIалтIа етта отт.

ТIехваьнна дIа мел водача саго ший бIехача кулгашца ловзайича, мишта яа еза уж?! Аз зийнад цхьайолча моттигашка «Маькхах кулгаш детта йиш яц» яха каьхат хьалтехий, из даар тIамелвоагIачун кулгех лорадеш. Царех оал из Даьлацареи нахацареи лерхIам лорабераш! Мозий гурматах йиза булкингаши, маькхи йохкаш латтачунга шорттига сай бохча юха тIорме чу Iочуделла, ай мозий ма дагIий хьа акхар тIа, IотIахайча из даар толхацадича хьа мича гIовт уж, хи киси дале а, киленка дале а тIатасса акхарна, ераш йиъа саг-м хургвац могаш аьлча, аз фу дергда царна тIаккха, лелаш да-кх ераш укхаза, де хIама дац аьнна, ший базар дIахо яхьа эттар кхалсаг. Со цу юхе латтача юкъа, цига мел илла маькх, боккъонца массаж е йоалаш санна, тIакIалтIа йитта яьлар цхьа кхалсаг. Из даар дохкаш латтачунга чIоагIа ала ловра сона, Iайха юий Iа укхазара чуйихьа хIама аьнна?! Ма даггара уйла йича цхьаккха оагIорахьа Iодужаш хIама дац-кх из! БIарччача дийнахьа мозий тIадаьгIа булкингаш мишта йохк нахага?! ХIама тIа ца тассарах, кулекашка ца йолларах, царна IотIабужа дом дIабаьккхача дар да аз дувцар!

Ма товш дац-кх из бусалба сагага! Ше лелаю базар адамашцара лерхIами бехки лорабеш лелае яхаций вайга Дала?! ТIаккха мара лархIа йиш йий, цох хьадаьккхар хьаьнала.... Уйла е вай цу хIаман! Саго леладу гIулакхаш ма дий, цун юхь дIахьокхар!