Skip to main content

СКФО хьалхленна кийчо еш ба вай боксераш

ЛоархIамеча яхьашка дакъа лаца дезаш бола 17-18 шу даьнна атлеташ, ма даггара, тренировкаш еш ба. Назранерча бокса лаьрхIа йолча зале, дIайода цар кийчо. Из хоам бу вай мехка спортах йолча Министерстве.

ВоккхагIволча тренера Хамхой Абдул-Къадыро яхачох, тренировкашка тIабийха 40 спортсмен ва.

«Шу хIанзза мара доладеннадац, бакъда, вай боксераша дакъа лаца деза йоккхий яхьаш дукха я. Эггара царех гаргагIа яр — СКФО чемпионат. Укх бетта, 24-ча дийнахьа, Ставрополе, Суворовская яхача станице дIахьоргья яхьаш», — аьлар Хамхой Абдул-Къадыра.

Спортсмений кийчон тIахьожаш ва, бокса керттера тренер, Дарсиганаькъан Або.