Skip to main content

Дика дешараш гуш хул

Сурхо тIарча дешархошта совгIаташ дIаделар

Малсагнаькъан Рашида Моти Сурхо тIарча № 1 йолча школан директор

Укх деношка (8 июне) Сурхо тIарча ГБОУ СОШ № 1 йолча школан актови зале дукха нах вIашагIкхийтар. Цига безбир дешара шу дика чакхдаьккхача юртарча шин школан дешархой, шоллагIъяр ийс шера дешар яр. 2015 шера денз бераш дика дешара оарцагIдоахаш йола яхь юртарча йиъэ школе дIакхайкаяьй Хучбаров Iадалмажита Уматгире пхе воIа: Адама, Илеза, Рамзана, ИсмаIала, Ислама. Беррига вежарий Москвера Н. Э Баумана цIерагIа МГТУ яьккха ба, цар караерзаяь балха говзал — инженер бизнеса и менежмент. Йиъ этапа йийкъа яр дешархошта юкъера яхь, вешта аьлча хIара четверте цар мишта дийшад хьожаш хиннаб хьехархой а яхьан дай а.

Нагахьа санна 100 процент пхиаш йолаш дийша ваьнна кIаьнк е йиIиг яле, цунна хьалхарча лагIах дола диплом, кубок, ахчан преми лора. ШоллагIча лагIанна чубоагIар 90 процент пхиаш а йолаш, цхьаккха кхоъ йоацараш, царна а дипломаш, медалаш, ахчан совгIаташ делар. Юххера, кхоалагIча лагIан тIа дIанийслураш бар 75 процент пхиаш а йолаш, цхьа кхоъ йоацаш дешара шу чакхдаьккхараш.

Лакхе хьоахаяьча шин школера совгIаташца белгалваьккхар 31 саг. Царна юкъе къаьстта дика дешаш хьабаьхкараш а, яхье котбаьннараш а бар Нальгиева София (7 класс), Измайлова Фатима (7 класс), Богатырева ПаьтIамат, Евлоева Мадина, Муцольгова Мадина, Тумгоева Зульфия, Богатырёва Марет (11 класс), кхыбараш. Уж берригаш юртарча № 1 йолча школера бар. Иштта ийс шера дешача школера геттара дика хьокхамаш гойташ чакхбаьннача Измайлова Линайна а Муцольгова Фатимайна а кхычарна а делар толашагIдола совгIаташ. Вежараша совгIаташ дир цхьаццаболча хьехархошта а. Масала, царех вар Аушев Хамбора Шамал, Измайлов Мухьмада Аза.

ВIашагIкхетаре къамаьл дир Хучбаров Уматгире воккхагIволча воIа Адама. Шоашта из гIулакх юртарча берашка дика дешийтар духьа дагадехад, аьлар цо. Тахан цар дика деше, уж юрта а мехка накъабоалаш хьалкхувргба, вахаре йоаггIаш йола моттиг хьа а лоацаш. Иштта кхетачене къамаьлаш дир шинна школан директораша: Мальсагов Рашида Моте, Хидриев Мухтара Любас, дешархой ноаноша, бераша шоаш.

Ювцаш йолча яхье котвала безам болаш вола дешархо тIехдика дешарал совгIа, республикански олимпиадашка е кхыча къовсамашка дакъа лаьца хила везар. Цул совгIа, доклад е реферат язъяь а, из школерча хьехархошта йовзийта а хила везар. БIарчча хьаийцача, дешара а хьаькъала а доккха цIай хилар цу вIашагIкхетарах. ДIа-юха къастале, цун доакъашхоша сурташ даьхар.