Skip to main content

Дешархой болча венав юртара имам

Сурхо тIарча ийс шера дешача школе хиннача вIашагIкхетарах лаьца

Укх деношка Сурхо тIарча ийс шера дешача школе вена хилар юртарча доккхача маьждига имам Баркинхой Iаддал-Хьамид. Цига хинна къамаьл цIенхаштача дешашта хетадаь а таханара дешархой воча хIамах лорабеш а дар. Корта бохабу малар мелар, гIаьле увзар, наркотик йоаллача хIамаех пайда эцар мел къа долаш, бусалба дино хьарама даь хIамаш да дийцар имама ялхлагIча-ийслагIча классашка дагIача берашта. КIеззига а царех хьокхавеннача сага, къематдийнахьа жоп дала дезаргда, аьлар цо. Къаьстта а теркам тIабахийтар цо насвай лелаярах, дегIа онк совдоаккхаш дола тикашкара хиш меларах хьадоалача зуламашта. Кагирхоша шоай унахцIено кIалъют, цу наькъаца бе-бе лазараш хьедеш нийслу. Цхьабараш, кхийна дIаэттача дийнахьа, шоай дегIамаш кIалдуташ, вахарцара къаст, хIана аьлча наркотикашца шоай вахар дийза нах дукха ца бахандаь.

Хьаьнала къахьегам, дика хIама дар мел деза лаьрхIа да дийцар вIашагIкхетаре. Сага даь цхьа дика хIама ворхI бIаьннега кхоачадергда ше, аьннад йоах Дала. Цудухьа дикадар кхоллаш а наха юкъе доаржадеш а ваха веза саг, ше дунен чухь йоаккхача хана. Цу гIулакха, зIамига волча хана денз, дика оамал, хоза гIулакх Iомаде деза. Даим дагалоаттаде дезарех да да-нана лархIар, цар юхь яр. МоцагIа Пайхамарá (Даьлагара салам-моаршал хилда цун) тIавенав йоах цхьа зIамига саг, гIоазот дийхка вала безам бар са, аьнна. Даьла Элчано хаьттад йоах, да-нана дий хьа, аьнна. Уж цун долга хайча, царга хьажа, из да хьона гIоазот, аьннад йоах зIамигача сагага. Нана мел еза лаьрхIай, да мишта лархIа веза дийцар имама. Эггара хьалха лархIа везаш вола саг малав хаьттача, вIаштта кхозза нана я аьнна белгалдаьккхад дин чухь, тIаккха мара да лархIа аьннадац. Мел хоза гIулакх шийх доаллаш яле а, даьца-наьнаца во хинна тIехье ялсмала яха йиш яц, уж ши саг къинтIера ца ваьлча. Да-нана дIадаьлча, шоллагIча аргIагIа лархIа везаш, сий де дезаш вола саг хьехархо хилар белгалдаьккхар. Укх тIехьарча хана, цхьаболча дешархошта а даьшта-ноаношта а дицлуш латтарех да, хьехархочунца эздел лаца дезаш хилар. Цу тайпара бераш хьехамга ладувгIаш хилац, цар цIагIарбараш школе хьабийхача, шоай бер фу деш да хьажа хьабахка ловш хилац.

Дешара хьакъехьа а къамаьл хилар укхаза. Эггара хьалха дин Iилма Iомаде дезаш хилар белгалдаьккхар дешархой болча хьоашалгIа венача дин викало, цул тIехьагIа дунен дешар а тайп-тайпара Iилмаш а довза дезилга хьоахадир. Дунен дешар дешаш ца хилча, наха ховргдац лерттIа ялат дIаде, шоай мохк лорабар духьа, герз хьаде, вахача моттиге эша кхыдола гIирсаш кхолла. Иштта лоархIаме да бе-бе метташ довзаш хилар, уж дувца хар.

Имама берий теркам тIаэзарех дар терроризм, экстремизм яха дешаш а царца дувзаденна ийрча гIулакхаш а. Иштта бусалба нахага а моллагIча дикача сагага а товш дац интернета гIонца гойташ дола во хIамаш, царга хьежар а хьарама да.

ВIашагIкхетар чакхдоалаш, имама жоп делар гулбеннарий хаттарашта. Масала, царех дар ийс класс яьккха боаллаше, йиIигаш маьре ухийташ хилар. Цу хьакъехьа имама аьлар: «ШарIий бокъонах, йиIиг пхийттара яьлча маьре яхийта мегаш я. Бакъда сона-м царга дешийтача бакъахьа хетар...» Иштта дийцар бераш школе аха беззача боараме хьа ца ухаш хиларах, дешар юкъахдуташ хиларах. Хьехархоша дийхар имамага, маьждиге ухача цар даьшка рузбан дийнахьа къамаьл дар, бераш цIагIа ма доагIаде, аьнна. Дешархошца сурташ даьхар школан хьаьшо.