Берий театри ишколи вIаший айхха бувзам болаш ши моттиг я. Цун фаьлгашка, пьесашка хьажа ухараш цига дешаш бола кIаьнкаши йиIигаши ба. Цудухьа айса болх беча ишколе музей е волалуш, аз лаьрхIар эггара хьалха цу чу театрий афишашта лаьрхIа кхо оагIув бола тумба оттае. Царех цхьа оагIув дIаеннаяр хьалха теникий театр оалаш хиннача, хIанз берий театр оалача культболхлоша къахьегача моттига. ЛаьрххIа цу театре вахар со, цигара афишаш яр духьа. Лоацца вIашагIкхетар хилар Хазанаькъан Мусайца а кхыболча театра болхлошца а. Кхаь тайпара афишаш ера аз, дешархошта берий театр довзийтар духьа. Уж дIатIалотайир музее латтача тумбанна. Цу хана денз, вай республикера берий театр довзаш ба тха дешархой. Из тумба хIанз а йолаш я, цу тIара гу Гайсултанов Iумара йоазох пайда эцаш оттабаь фаьлг, Г. Ландау «Машаи чаи» фаьлг, А. Адреваа «Чуче», М. Супонина яха фаьлг-ловзар «Бука». Дуккхача наха къахьийга оттадаьдар уж фаьлгаш, масала, цар режиссёраш-оттадаьраш бар П. Козец, Я. Делаев; суртанчаш — Марзбиканаькъан Б., Гаджиев С., Ярыжанаькъан Р.; ашарашца гIо даьраш — Iарчакханаькъан М., Шерипов Э., кхыбараш. Цу заман чухь театра керттера режиссёр ГIалгIай Республикан халкъа артистка Малсаганаькъан Роза яр. Из дуккхача шерашка теникий театре болх баь, из гIулакх дика довзаш саг яр.
Бераш театре дIаухаш санна, театр а доагIаш хулар ишколе хьоашалгIа. Цкъа иштта «Цогала кIориг — оапишк» яха РФ гIорваьннача артиста Домбровский В. оттабаь фаьлг бахьаш баьхкар уж. Аз царна хьалхаваьнна лела саг чувигар музее, дIахьекхар берий театра хетадаь оахош даь балхаш. Цо цхьаькха а афиша елар музейна совгIата, из я лакхе хьоахабаь фаьлг а из оттабаь режиссёр а, ашарашца из хозбаь Борисовская Л. йовзийташ.
Теникий театре болх баь нах сона хьалха а бовзар. Масала, 1967 — 1973 шерашка, вешта аьлча, ялх шера Шолжа-ГIалий тIарча республикански теникий театра директор хиннача сагаца, пен мара юкъе боацаш, кхаь шера болх баьб аз, цун кулгалца. Абаьданаькъан Бек цхьан хана теникий театре директор хиннавар, хIанз из «Сердало» газета культуран отдела керте латтар, хIаьта со цун отделера корреспондент вар. Бек ше а вар берашта цхьацца хIамаш яздеш. Сона бовзар Ховтанаькъан йижарий, уж цхьан хана Наьсарерча № 1 йолча юкъерча ишколе деша багIар, цига 10 шера деша ваьгIав со а. Иштта дувцаш хезад сона, вай цIихеза вола иллиалархо Имагожанаькъан Осман а ший къахьегама юхьиг дIайолаеш, теникий театре балха хиннав, аьнна. Дукха дика артисташ хиннаб цига балха. Цар оттаяьй тайп-тайпара Чахкинаькъан СаIида («Зураб цхьан хIамах ма кхера»), В. Маслова («Али-бабаи шовзткъа гIаьрхои»), Янданаькъан Ж. («ТIеххьара гусар»), Абаьданаькъан Бека («ЭгIаяь бийса»), Пушкин А. («Чкъарахочохи чкъаьрахи») пьесаш а фаьлгаш а. Йоккхача Россе городашка гIолла гастролашка хиннаб уж.
Вай республике хьадаьхке а хул арахьара берий театраш. Уж вай юрташкарча ишколашка шоай говзал гойташ чакхдоал. Теникий театрай, берий мел долча театрай болхлой даькъалабувца лов цар дезача денца.
