Украинерча тIема доакъашхой болча бIухой дезалашта эшачунга хьожаш, цар хьашташ кхоачашдеш я паччахьалкхе. Вай къаман кагий нах тахан деналца, майралца шоай цIи дIахазийта, цига Даьхе лораеш латт.
«Iан шоллагIча бетта лаьттан сертификаташ делар тIема доакъашхой 21 дезала. Тахан, кхы а барайтта сертификат дийкъар наха лаьтташ доала дерзадеш. МагIалбике, Наьсаре, Шолжа-Шахьаре дIабихьар из болх», — язду ший телеграм-канале мехкадас Келаматанаькъан Махьмуд-Iаьлас.
Республикан кулгалхочо белгалдир, тIема доакъашхой дезалаш цхьаккха хIама эшаш хила йиш яц, аьнна. Цу наьха вахарера кхоачамбоацараш юстардаха оттаяь, лаьрххIа комисси я. Массахана къаьстта цу мугIарерча наьха гIулакхага хьожаш, царна лакха терко еш, хила деза вай, аьлар цо.
