Карарча шера, чиллан бетта пхийттлагIча дийнахьа призывника Ди долаш, вай мехка хьалхара дIахьоргья Ерригроссе «ТIема-патриотически диктант» просветительски акци. Из дIахьош хилара маIан да-Российски арме мугIарашка тIема служба дикал лакхъяр, Российски Федераце мах болча исторе оагIонаш дегIайоалаяр.
«ТIема-патриотически диктанта чудоагIаш хургда: Россе исторе хаттараш, цунна карагIдаьннар тIема наькъашка, цунна коталонех, турпалхоех, ТIема мугIарашка котало йоакхаш белгалбаьннарех.
Оттадаьча декхарашта юкъе хургда: паччахьалкхен символиках, сийленгех, Россе къамий традицех, Iилма наькъа тIа вай мехка карагIдаьнначох, искусствах, спортах, технологех, къахьегамах лаьца. Цхьаькха хаттар хургда обществознани, бокъо социалоги ювцаш. Диктанта доакъашхой хургба тайп-тайпарча профессех, тайп-тайпарча ханара нах, ишколера дIаболабенна, пенсионерашка кхаччалца», — аьлар «сердало» газетага, арахьарча бувзама, къаман политика, зарбана, хоамий Министерства кулгалхочо Беканаькъан Вахас.
