Skip to main content

УнахцIенон колледжера кхоачамбоацараш юстарадахара, гIо дергда Парламента депутаташа

Тутайнаькъан Аьсета цIерах йолча, унахцIенон колледжа эшачун гIо де, кийча ба, вай Парламента депутаташ. Цох лаьца дийцар, Горчхананаькъан Беслана хьалхле еш, дIайихьача кхетаче. «Йоккхача кхетаче дакъа лоацаш хилар, комитета кулгалдеш вола Олиганаькъан Бадрудин, дешарахи, культурахи, хоамий политикахи йолча Къаман Собране комитета кулгалхочун гIонча вола Хамхой Батыр, колледжа кулгалдеш йола Озанаькъан Зоя», — язду хоаме.

«Тутайнаькъан Аьсета цIерах йола унахцIенон колледж, тахан, республика вахаре лоархIаме моттиг дIалоацаш я. Лорий йижарий кийчъбеш бола из кхуврч, хьаэттача хано дIадеххача тайпара кийчо йолаши, кхоачамбоацараш юстарадаьхаи хила беза», — аьлар Къаман Собране депутаташа. Кулгалдеча Озанаькъан Зояс дийцар таханарча дийнахьа колледжа ца хилча даргдоацаш эшашдарех. Къаьнарча гIишло чу, ма хетта, болх дIабахьа аьттув балац. Кабинеташ ца тоаш да, таханара колледжа хьал. Хьоахадир, дийша баьннача йижарашта болх — моттигаш лаха, геттара хала хулалга. Керттерачарех да аьнна оттадир, кулгалхочо дешара кхуврча, ший доалахьа машен ца хилар. ДукхагIа бола студенташ, гаьнара хьаухаш ба деша, шоай ханнахьа хьакхача аьттув ца хиларах, хийла дешар юкъагIа дус.

Кхыдолча кхоачамбоацарех а дийцар кулгалхочо депутаташца. Ма хулла, колледжа хьал тоаде, могаш дола гIо де, хьожаргба шоаш аьлар хьакимаша.