Skip to main content

Utair авиакомпане ГIалгIайчера Сочи дIа а, иштта вайцига юха а йоагIаш йола авиарейс дIайолайир

Utair авиакомпане, ГIалгIайчера, курортни Соче дIа а юха а йоагIаш йола авиарейс дIайолайир. Из фекема кIира шозза рейс еш хургда, аьнна хоам бир, «Сердало» газетага, ГIалгIай Республика пресс-служба.

«Магас» аэропорта яхачох, хIанз укх сахьте, ГIалгIайчера Сочи додача фекема рейсаца болхаш бола нах 90% я. «Кастлуш регионера керда рейс а хьаелларгья Санкт-Петербурге йодаш, из хургья шоатта дийнахьа а кхаьрача дийнахьа а, хIаьта моажола бетта ийслагIча дийнахьа денза, Тюмене йодаш йола рейс а хьаелларгья. Самаре додаш дола фекема, ше массаза беш бола болх беш да, кема дизза бола нах дIакхувлаш да», — йоах хоамо.

Говзанчаша оттабеча маьхага хьежача гуш да, ГIалгIайчера а, иштта кхыча регионашка ухаш йола керда фекема рейсаш юкъеяхаро таро хулийт, регион социально-экономически дегIайоалае. Белгалду, бехаш бола мах а лакха ца хилар, хIана аьлча, рейсашта доагIа ахча федеральни а, иштта моттигерча бюджетера а хьожадеш хиларах.