Skip to main content

Яхаргья дегашка массе хана!

Вай мехка цIихеза хиннача хьехархочо, Овшанаькъан Баадулий Тамарас, кхувш латтача тIехьен, хоза хьехам луш дIадихьар ший вахар

Мехка цIихеза хьехархо йолаш яьха Овшанаькъан Баадулий Тамара, ишкола вахаре боккха оагIув болаш лаьттар! Укх шера, бекарг бетта 2-ча дийнахьа 80-шу даьнна йолаш хаьдар цун сийрдача вахара никъ. Из яр къахьегама ветеран, Российски Федераци лоархIаме болхло, ГIалгIай Республика цIихеза хьехархо! Ший вахарера 62 шу беркате тIехье кхееш ишколе къахьегаш Iодилар цо. 1942-ча шера Мужиче яьяр из дог цIена, беркате саг.

Хьехархой наькъа тIа, ший хьалхара гIа 1958-ча шера баьккхар цо Первомайскерча юкъерча ишколе зIамагIа долча берашта хьехаш. 1959-ча шера из деша эттар Шолжа-гIалий тIарча педагогически института филологически факультете, 1965-ча шера тIехь — дика дешаш из чакхъяьккхар цо. 1961-ча шерагара 1975-ча шерага кхаччалца Мужичера ишкола кулгалхо йолаш къахьегаш лаьттар из. Дешархошта дукха езаш, ший дезала санна царна хьехам беш, дог лазаш, ишкола ерригача тоабо лоархIаш чакхъяьлар Тамара.

Цун дика бовзар ший болх, бовзаш хиларал совгIа, ший цIа лоархIар цо ишколах, беррига низ дIатIабохийташ тоаде гIертар цигара хьал. 1975-ча шера эрсий моттеи, литературеи хьехаш хилар из дог — цIена хьехархо. Дешархой хозахеташ болхар цун уроках. Цун ховр, цхьа ший тайпара, тамашийна вахар шийна гонахьа кхолла. Дешарцара берий безам чIоагIбеш, цар начIал гучадоаккхаш къахьегар цо. Керда хьабаьхкача хьехархошта дега эггара гаргагIа йола доттагIа хиле дIаоттар из.

Ишколан вахаре дуккхача шерашка ше Iомадаьр царца декъар, гIо де кийча яр хIара хьехархочоа. Цун хьаькъал долча къамаьлаша, дукха керда хьехархой нийсача наькъа тIа баьхар. МоллагIча темах лаьца къамаьл де атта дар Тамарайца. Наха дала хьаькъал долаш, сабаре, кIаьда, тешаме новкъост яр из ерригача ишкола тоабан. Тахан, из санна йола саг юкъера дIакъастар, тха массане дегашта доккха халахетар да.

Дика саг, цун вахар хаьдача а сийрда седкъа хиле вах ше вийзарий дегашка! Ишттача нахах яр Овшанаькъан Тамара. Цун дегага хинна дикал тха массане вахаре йисай. ЦIена, сийрда никъ шийна тIехьа бита дIаяхар из эздийча оамалех йизза йолаш яьха саг! Мужичера ишкола тоабан хьехархой из хало екъаш ба цун гаргарча нахаца. Дала Iаьхартен меттиг даькъала йойла цун!