Кхоана ши сахьат даьлча, Эрсий паччахьалкхен ГIалгIай мехкарча музыкально — драматически театра, бахархой хьажа бех «Зулами таIазари» яхача спектаклега. Спектакль хьокхар дувзадаьд, из роман яздаьча Достоевски Федора 200 шу дузача ден. Дерригача дунен тIа цIихеза дола роман, эрсий йоазонхочо арахийца 150 шу даьннад.
«Зулами таIазари» яха болх, цIихезача воккхача йоазонхочун, эггара чIоагIагIа наха юкъе баьржарех ба. Дукха сценаш тIа гойта, дукхачар дешаш латта из роман, вахарера дуккхадараш гойташ да. Спектакль вай бахархошта кечъяра тIехьа къахьегаш хиннараш ба: москвера режиссер Фейгин Михаили, цIихеза хореограф вола Ходоркайте Рамунии. Уж нах, вай театре хьабийха, ха йоаккхаш хиннаб из спектакль кечъеш.
Спектакль оттаяра болх юкъе бода «Пушкински карта», «ЗIамигача пхьешкарча театрашта гIо дар» яхача программашта. «Зулами таIазари» яхача спектаклега хьажа, вай бахархой, аьттув хургба кхаь дийнахьа. Билетий гIулакха, телефон дIатоха еза укх номерах — 8988 120-67-61.
