Skip to main content

Вай республикерча лорий сихача новкъостала тоаба къахьегам белгалбир

Чоалханерча хьалах йолча медицинаеи, лорий сихача новкъосталаи йолча тоабай къахьегам белгалбир Назране

Чоалханерча хьалах йолча медицинаеи, лорий сихача новкъосталаи йолча тоабай къахьегам белгалбир Назране, уж даькъалбийцар профессиональни цIейца- Сихача новкъостала (Скорая помощь) болхлочун цIейца. Вай Мехкдаь а, ший а цIерагIа баркал аьлар ГIалгIай Республика Правительства кулгалхочун гIонча йолча Амриева Марема лорашта.

Республика унахцIенон министерство беча хоамах духхьал дIадахача шера вай мехка гIолла сихача новкъостала тоаба 74 эзар моттиге кхаьчар, царех 4545 моттиг ювзаенна яр СОVID-19. Таханарча денна учрежденешка къахьегаш ва 425 лор, царна юкъе короновирус юхатохаш къахьегарах белгалбаьннараш а ба.

Цу тайпара РФ Президента баркал оалача грамоташца белгалвир гIалгIай ялх лор, 4 фельдшер, 2 водитель. Иштта 3 лора, 2 фельдшера вай республика Кулгалхо баркал оалаш йола грамоташ елар.

Хоам бу моттигерча чоалханерча хьала аьнна йолча автопарке 51 машина чуйоагIаш хиларах, цул совгIа иштта керда сихача новкъостала йола машинаш а.

Уж дIадахача шера РФ Правительства фонда чотах ийцаяр.

Амриева Марема оттабаьча маьхага хьажача моттигера сихача новкъостала станци лакхача профессиональни боарам тIа къахьегаш я. Шоай болх дика бовзаш, из боагIача бесса вIашагIбелла цар хиларах, этта хинна чоалхане хьал аттача даккха таро хилар.

ДикагIа болча говзанчашта совгIаташ делар, белгалваьннача 50 лора дагалоацама совгIаташ а балха дикал гойтарах, дукхача шерашка къахьегарах баркал оалаш йола грамоташ а елар.