ЦIихезача, воккхача йоазанхочоа, Чахкенаькъан СаIида хетаяь сайре хилар къаман библиотеке. Ваха висаваларе, хIанз 85 шу дузаш хургвар деша говзанча.
Кхетаче йийшар цун байташ, кхыдола литературни йоазош. Гулбеннараша хозача дешашца дагалаьцар Идриса СаIид. Цига эггара лоархIамегIа йола хьаьша яр цун цIен-нана Сандрой Малика.
«Массане дегашка воккха, боча йоазанхо хинна ваха виса Чахкенаькъан СаIид дагалаца баьхкабар цун новкъостий, йоазанхой, дешархой, студенташ.
«Чахкенаькъан СаIид — деша говзанча» яха цун книжкай гойтам кийчбаьбар библиотеке. Йоазанхочо хьабена кхоллама никъ, цун деррига вахар гойташ дола сурташ, каьхаташ, книжкаш, иштта кхыдараш а дар цу юкъе. ЦIен-нанас Маликас доккха баркал аьлар из сайре кийчъяьрашта, йийшар гаьнарча Казахстане дIаяхача ший бера хана хетаяь, къам мехкахдаккхар дувцаш йола дог Iовжаду байт. Чахкенаькъан СаIида книжкаш делар цо гулбеннарашта», — дийцар тхога библиотекан болхлоша.
