Skip to main content

Берашта лаьрхIа дола книжка

Йоазонхочо Евкуранаькъан Лидас эрсий меттала арадаьхад зIамагIбарашта кхелла ший йоазош

Укх деношка Буро тIа кепа теха арадаьннад Россе йоазонхой Союзá чуйоагIаш йолча Евкуранаькъан Марзбика Лидай аргIанара книжка. Ховш ма хиллара, Лидас язъю байташ а дувцараш а. Бакъда «Майра боргIал» яхача цун кердача дешарга (книжканна) юкъедахараш алхха дувцараш мара дац.

Йоазонхо яхаш я ЖIайрахьа района ОалгатIе яхача юрта. Лохе гIолла дода Аьрзии ОалгатIеи екъаш дола хий, цох тиллача тIаьх дехьаваьлча, нах бахача юрта кхоач. Из я Лидас ший дезал бах яхаш ювца ОалгатIе. МаьрцIай ба Марзбика Лидай Оалга тIара. Из ше Илинаькъан я. Цхьан юкъа медсестра йолаш къахьийгад цо, бакъда цо дийша хиннад кхыдола дешараш а. Масала, Буро тIарча ГПТУ-1 деша этта, лакхарча кепайоазон полиграфист-печатник яха говзал караерзаяь хиннай цо, цул тIехьагIа цу лостамагIа болх беш а хиннай цу шахьар тIарча издательстве. Лида безаме, кIаьда саг я. Къахетаме саг а я из, аз хоза хеташ дийшар, чарахье ухаш, оакхарий доадар могадеш доацилга дувцаш хинна цун дувцар. Мехка моцал еча мара топ кхосса мегаргьяц оакхарашта, яздаьдар цо хьоахадаьча дувцар тIа. Иштта къахетамах дизза да цун «ЧIагаргаш», «Лоам доахан леладар», «ГIарагIураш», «Сакхетаме Адам», «Къахетаме хилар» яха а кхыдола а дувцараш. Бераш дийнаташта зе ца де, царна гIо де, уж шелалах, моцалах лораде Iомаду цар. Цу тайпара болх ма хулла дукхагIа бе безаш я этта зама, хIана аьлча берашта ца гуш къизалаш йисац телевизор чугIолла а интернетага гIолла а. Марзбика Лидас яздеш дола дувцараш бокъонца хинна, шийна бIаргадайна хIамаш дувцаш хул, цудухьа, царех тешаш, тIаэц уж дешаш волча сага. Хьалха духхьал гIалгIай меттала мара уж деша йиш хиннаеце, хIанз эрсий меттала деша йиш я уж, хIана аьлча лакхе хьоахадаь цун керда книжка «Майра боргIал» эрсий меттала да. Цу тIарча 15 дувцара таржамаш даьр я «СелаIад» яхача берий журнала керттерча редактора заместитель, Россе журналистий Союза доакъашхо Келиганаькъан Роза. ХIара дувцарца да, цун чоалацамга хьежжа дилла, тайп-тайпара бесаш дола сурт. Дукха къахьийгад из книжка хоздеш художника ГIудантанаькъан Дукхеша. Хьоахадаьрел совгIа, кердача книжканна юкъе да «Майра боргIал», «Говза цоги», Хьава«, «Пхьагал», «Газа ийккхача эккх бIийг а» яха а кхыдола а дувцараш.

Дувцаш дола книжка арадаккха ахчанца новкъостал дарах, Евкуранаькъан Лидас баркал оал ЖIайрахьа района администраце кулгалхочун Лаьнанаькъан Ахьмада Борисá.