Наркотик яхача дохьажо дегIа мел доккха зе ду, цунцарча бувзамо сага вахар дохадарах дийцар вай республикерча керттерча нарколога Ваделанаькъан Джамбулата.
«Джамбулата бахархошка дийцар, цкъа наркотиках хьокхавеннача сага ший вахар халача хьале оттаделга. Цу бIехача хIаманца бувзам лелабаьчоа хала хургда наха юкъе тешаме саг хинна дIаотта, гарголонаш хотта.
Новкъосташта, бовзарашта юкъе соввоал цу тайпара гIулакх леладер. Ший вахара никъ ба цу сага толхабер, ший цIагIарча наха, ше кхеваьрашта боккха бала тIакхолл цо.
Наркотикашца вахаш вола саг, ший кхоане ехкарех ва», — йоах хоамо. Таханарча дийнахьа къовсам лоаттабу МВД болхлоша наркотикаш йоаржаерашта духьала.
Наркомани яха зулам тхьовра денз хьадоагIаш да, наьха вахара овлаш тедаш, Iазапе увттабеш. Цунга хьежжа, тахан вай дерригаш оарцагIдаьнна, хоададе дезарех да из хIама! Наркотикаш йоаржаеш бараш Iаьдала болхлошка дIабувца беза, вIалла хье ца луш. Вай цхьана хилча мара, соцалургдолаш зулам дац из!
