Наркотик яхача зулама духьала къовсам лоаттабеча комиссе, МВД болхлошца, шахьарерча кагирхой советаца, ловзар-викторина дIайихьар, 9-чеи 10-чеи классашкарча Илдарха-ГIалий тIарча дешархошца.
Цу гIулакха керттера бахьан дар, наркотик яхача дохьажо толхадеча вахарах, доадеча иразах, цкъа цох хьокхавенначун дегIа тIаоттача Iазапах ма дарра кагирхошта дIадовзийтар. Цул совгIа, эггара лоархIамегIа хеташ дийцар, из дохьаж доаржадеш лелача зуламхошка Iеха ца вайтарах, уж Iаьдалга дIабувца безача наькъах. «ЧIоагIа эшаш дола из гIулакх дIадихьар, шахьарерча № 5 йолча ишколе.
Вай дерригаш юкъедаха дезаш, тахан даьржа латташ доккха во да наркотик. Кагирхоша дийцар, цу дохьажах лоравеш волча наькъех», — аьлар тхога из кхетаче дIайихьараша. Викторина йистеяьлча, котбаьннараш белгалбир совгIаташца. Наркоманена духьала леладе дезарех дувцаш дола йоазош дийкъар кагирхошта юкъе.
