Skip to main content

Юртара моттигаш тоае аьнна хьахьожадаь, 1,3 млн сом ахча диараш гучабаьннаб

Шолжа района чуйоагIача юрта хьал тоаде аьнна, Iаьдало хьахьожадаьча ахчах 1, 3 млн сом диалга гучадаьлар прокуратура болхлошта 
Султыгнаькъан Йоакъап газета «Сердало»

Шолжа района чуйоагIача юрта хьал тоаде аьнна, Iаьдало хьахьожадаьча ахчах 1, 3 млн сом диалга гучадаьлар прокуратура болхлошта. Из ийрча гIулакх зийра, хьахьожадаь ахча малагIча наькъа тIа дIахад хьожаш, тохкам баьча, Шолжа районерча прокуратура. Деррига тохкаш баьча белхо хьахьекхар, 2019 шера ГIажара-Юртарча администраце ООО «Зеленострой» яхача кхуврчаца контракт хетта хинналга.

ЧIоагIъяьча контрактага диллача, юртара моттигаш тоаеш, доккхий балхаш дIадахьа дезаш дар. Бакъда, гучадаьлар цхьаккха тайпара болх дIабихьа боацалга, контракта тIа оттадаьчох даь хIама дац. Юрта хьал тоаде аьнна хьаденна ахча, вIалла хье ца луш, киса делла дIабахараша региона бюджета 1, 3 миллионага кхоачаш зе даьд.

Хьагучох, шоай хьал чIоагIагIа дага даьллад царна, цунга хьежжа, дега хало йоацаш, Iаьдала рузкъа диъа, паргIатта наб е лаьрхIа хиннаб.

Бакъда, из гIулакх иштта тесса дита лаьрхIа яц прокуратура. ГIулакх дIахо тохкаш латт тохкама болхлоша, цул тIехьагIа шоашта доагIа таIазар, дизза, дIаэцаргда юрта хьожадаь ахча диараша.