Skip to main content

Зе деш, болх берашта гIод тохаргда

Шоай болх бахьа безача тайпара дIахьош боацача, гIишлош еш боахкача болхлоша телхаду лаьттан кIалгIолла долха Магасера тока кабелаш. Цул совгIа, из хIама шоаш дича е шахьара администрацен болхлошка, е из гIулакх меттадоаладе дезарашка хоам ца беш, дIаух. Цу хьакъехьа тхога дийцар Магасерча мэре.

«Бахархошта ток дIа ца кхачара гIулакх тохкаш, боккха болх дIахьош латт шахьаре. «Магаса электросеташ» яхача моттигера болхлой, толхаяь хинна моттигаш лохаш, къахьегаш лел», — йоах хоамо. ХIанз дукха ха йоацаш, токаца хинна хатар мичахьа бух болаш да хьожаш, лийлар цу гIулакхах бехктокхаме бараш.

Гучадаьлар, гIишло еш боахкараша, лаьттанца болх беча хана, цу кIалгIолла долха тока кабелаш толхадаь хилар. Из хIама шоаш дича, ала дезача моттиге дIа а ца оалаш, толхадаьча кабелашта лаьтта дIатIахьекхаш, дIаихаб, наха цох хургболча хьовзама уйла е сагота боацараш. «Из болх беш лийннараша, Iаьдало оттадаьча законах шоашта доагIа гIод дIаэцаргда», — аьлар шахьарерча мэре.

Магаса кулгалхоша кхайкарал ду цу шахьаре лаьттанца, гIишлошца болх беш мел боахкарашка! Боккъал а лоралуш, зе хургдоацача тайпара, бехктокхаме дIакхахьа шоай болх! Лаьттан кIалгIолла долха тока кабелаш толхадеш, болх беш баьхкарашта гIод тохаргдолга тешшаме да шоана!