Skip to main content

ЗIилбухерча Федеральни университета болхлошца кхетаче йир вай Мехкдас

ЗIилбухерча Федеральни университета НИИ кулгалхочунца, профессор волча Пшихопов Вячеславаца, РФ тIема-промышленни комплекса Iилман-технически совета доакъашхошта кулгалдеча Медведев Михаилаца, зIилбухерча Федеральни университета профессор йолча Iалбаканаькъан Фатимайца, ГIалгIай паччахьалкхен университета ректораца кхетаче дIайихьар вай Мехкдас. Дувца оттадаь керттера дош — НИИ (цара) региона бувзам. ВIашагIкхетаре Мехкдас белгалдир, республике технически оагIонах бола болхлой тоаш ца хилар. Цу мугIарера говзанчаш, дерригача къаман, боккха аьттув болаш хургболгах дийцар. «ВIаши бувзам хоттаро шийна тIехьа доккха дикаш дахьаргда. Республикера технически оагIорахьара болх-моттигаш тоае аьттув хургба тха.

Цу мугIарерча профессей говзанчаш, тахан, тхона геттара эшаш ба, цунга хьежжа, шун вузаца бувзам боккха пайда бахьаш хургба. Шун дешара кхуврче дукха да аьттувбараш», — аьлар Келматанаькъан Махьмуд-Iаьлас. Хьоахаде деза, дукха ха йоацаш ЗIилбухерча Федеральни университета радиотехнически системахи, управленехи йолча институтаца вай республико лоархIаме чIоагIо яьлга. Ректор йолча Iалбаканаькъан Фатимас яхачох, из гIа дукха уйла яь, вайна массанена беркате хургболаш ба, керда IТ инженерни технологеш хьакхоллара. Доккха баркал аьлар цо, дукха мах бола оборудовани шоашта яларах. ВIаши бувзам чIоагIбара тIехьа, дешархой кхетам лакхбергбола электротехникахи радио-электроникахи йола лаборотори хьакхолла лерхI.

«Из договор, технологен гIулакх доаржадеш дола, дика хинна дIаоттаргья. Цунга хьежжа, тха университете дешаш болча кагирхой дикка аьттув хургба. Керда технологеца дувзаденнараш довзаргда къонача тIехьенна», — аьлар Iалбаканаькъан Фатимас. Iилма-тохкама института кулгалдеча Пшихопов Вячеслава яхачох, ГIалгIай паччахьалкхен университета къахьегамхошца уж, тахан, хьалхара кхетаче еш бац. Таганрогерча инженерно-технологически академе вIашагIкхетар долаш дийцадар цар вIаши бувзам лелабеш дIадихьача дика хургдолча наькъех. «ДIахо йодача хана кхы а хургья вай вIаши бувзам хотташ йола моттигаш. Тахан, Фатимас цу соглашенена кулг яздаь, геттара дика хет сона. Цхьа барт-безам болаш дIахьоргболча беркатеча белха хьалхара гIа ба из», — аьлар цо.