Skip to main content

Зунгатий санна лел мухькхухьа машенаш

Республика наькъашка цу тайпара машенаш мел гуча хана, маьрша гIолва хьо ала догдоагIа царга. Цар тIабетта мухь селлара чIоагIа хилар бахьан хинна а Iац из, наькъа бокхонаш лораяр гIулакх а ледара ма леладой вай. Хоза хеташ, хьалхара ханаш дагаухаш хьежаш хул цу моча мухь ийца йолхача машенашка.

Боккъонцахьа бола юртбоахам хилара бахьан да из. Хьалхарча хана цу моча нахах ахархо оалар. Цу цхьан дешо, хIетта еттача маькха хьадж хьакхетийт вайна. Цул совгIа, уж мо бола ахархой хиларо, таро хулийт республика бахархой истолаш тIа кердача кхачана тускараш лоаттаде. Из атта дац таханарча денна, хIана аьлча, хьалхагIа санна шийна ма хетта юртбоахам лелабе вIаштIехьдалац тахан, моттиг кIезига хиларах.

Из керттерачарех хила деза моллагIа йолча паччахьалкхен, мохк дегIабоалабара ца хилча даргдоацар да из. Гурахьа Россе цаI дола кхаж тассара ди да Федераце Совете, Паччахьалкхен Думе, регионий халкъа гуллама депутатий. Кхы а ха йоллаш, наха уйла йича бакъахьа яр, мохк дегIабоалабара, наха эшачунца Iалашо яра къахьегаш хургвола саг харжара. Цудухьа, малагIча сага вай из кхаж нийса тоссаргба тийша да, хоржамий даькъа тIа дIа а даха воашкара йоаггIача урна чу из Iочутассар.

Аз кхадж тассабар аьнна-м хIама хувцалургдацар яхача наха хьалха даккха ловра сона цхьа дувцар: ИбрахIам пайхамар цIерал тессача хана, из цIи йоаеш хIара зунгато кхихьа хинна хи тIадамаш. Нагахьа санна беламе хаттар отте: «Цу тIадамашца Iайха цIи йоаергъя моттар хьона, аьнна?», — жоп лу аз: «Аз сайна могар дир, Къематдийнахьа сай низ ца кхачарах бахьанаш леха дезаргдоацаш».