Нальчике дӏайихьача яхьашка 22 майдилг яьккхар вай спортсменаша
Нальчике дӏайихьача регионашта юкъерча яхьашка 22 майдилг йоаккхаш белгалбаьлар вай наьканчий. Из хоам «Сердалога» бир Минспорта зарбан болх лелабеча Гӏаппархой Аишас.
Даьхен лорабой Ден хетаяьча яхье шин дийнахьа шоай говзал гойташ хилар 340 спортсмен. Къилбаседа Кавказерча наьканчий клубашкара спортсменаш бар гулбенна хиннараш. Цу юкъе яр Ставрополь, Гӏаьбартой-Балкхарой мохк, Къарший-Черсий мохк, Гӏалгӏай мохк, Хӏирийче.
Малсаганаькъан ӏамархан тренер волаш ӏомаваь вай бархӏ спортсмен дикка белгалваьлар цига. Хьалхара моттиг яьккхар Лаьнанаькъан ӏимрана (16-18 шу) 50 метр брассом, хьалхара моттиг 100 метр брассом; шоллагӏа моттиг 50 метр букъ тӏа уллаш наьк деш. Мартазанаькъан Мухьаммада (16-18 шу) 50 метр баттерфляйх котало яьккхар, иштта 100 метр баттерфляйх, 50 метр ший лоӏам болчча тайпара наьк деш.
Шаденаькъан Мухьаммад (14-15 шу) кхоалагӏча моттиге эттар 50 метр ший лоӏамагӏа наьк деш, 100 метр шийна товчча тайпара наьк деш кхоалагӏа моттиг. Мержой Денех (10-11 шу) 200 метр ший лоӏам болчча тайпара наьк деш чемпион хилар, букъ тӏа уллаш 50 метр наьк деш, хьалхара моттиг яьккхар цо. Шоллагӏа моттиг елар Мержой Элберда 50 метр брасса хьисапе наьк дарах, 100 метр брассаца - кхоалагӏа моттиг.
Лаьнанаькъан Берс (14-15 шу) шозза кхоалагӏча моттиге эттар 50 мерт брассаца, 100 метр брассаца йолаш. Шоллагӏа моттиг луш белгалбаьлар (4х100) Лаьнанаькъан Берс, Шаденаькъан Мухьаммад, Лаьнанаькъан ӏимран, Мартазанаькъан Мухьаммад.
Ишттача толамца белгалъяьлар (4x100) Йовлой Саӏид, Шаденаькъан Мухьаммад, Лаьнанаькъан ӏимран, Мартазанаькъан Мухьаммад вола тоаба.
