Дӏадахача шера 38 кхетаче йир терроризма духьала
Терроризм, экстремизм яхача зулама духьалара 38 кхетаче дӏайихьай мехкарча кагирхой гӏулакхех йолча Комитето дӏадахача шера. Из хоам «Сердалога» бир цу моттигера.
МВД болхлой, дийша нах, тӏема операце доакъашхой юкъе болаш, дукха кхетаченаш, лекцеш дӏакхухьаш болх лоаттабаьб мехка кагирхой гӏулакхех йолча Комитето, гӏо деш лелараша. Кагирхошца санна хьехархой тоабашца, паччахьалкхен моттигашкарча къахьегамхошца лоаттабаь болх ба из. Цу оагӏонцарча хьинардараша телеграм-каналага гӏолла хьалхадоахар бахархошта интернета моттигашка кагирхой тувлбе гӏерташ хьувзарашца цхьаккха тайпара бувзаме вала, цар яхар теркалде йиш йоацилга, иштта моллагӏа тешаме доаца хӏама зийча, ӏаьдалга ӏалаьмате сиха хоам бе безилга. Цул совгӏа, кагирхошта юкъе цхьацца хаттараш телаш болх лоаттабир 97 анкета оттадаь.
«Гӏалгӏайче - кхерам боаца моттиг» яха республикански кхетаче лоархӏаме моттиг дӏалоацаш хилар цу огӏонца. Кагирхошца болх лоаттабеш вола 120 цу оагӏонцара говзанча гулвелар цига.
«Цу доккхача зулама духьале еш дола гӏулакхаш доаржадар, вайга массанега кхоачашдола лоархӏаме декхар да. Терроризм яхача бӏехача хӏаманна вайна юкъе моттиг яц! Къонабарашта юкъе массахана цу оагӏонцара болх лоаттабе беза вай», - белгалдир кагирхой гӏулакхех йолча Комитета кулгалхочун декхараш кхоачашдеш волча Местой Бахьаудина.
