Вай мехкара 50 лор шоай говзал лакхъеш ва цIихезача вузе
Сеченова цIерагIча университета фармакоэкономиках йолча кафедрага гIолла, шоай балхацара говзал лакхъеш ва вай мехкара 50 лор. Из хоам «Сердалога» бера цу оагIонцарча министерствера. Поликлиникашка, амбулаторешка къахьегаш бола лораш ба цхьацца кердадараш шаьрдераш.
«Программанна юкъе да могаш боацача бахархошта массахана молхаш лоаттаярца дувзаденнараш. Из болх боаггIача боараме дIабахьийтара тIехьа терко лоаттаеш я федеральни оагIув. Цу юкъе ба каьхаташцара болх, молхаш хьачуэцар, лерттIа уж дIакхачийтар, иштта кхыдараш а», - йоах тхога бенача хоамо.
Из гIулакх чIоагIа лоархIаме да тахан. Къаьстта поликлиникашка, амбулаторешка къахьегаш бола лораш ба массахана молхаш эшаш болча унахошца болх лоаттабераш, цар хьашташка хьожараш. Цунга хьежжа, дегIаца лазар леладеча наха йоагIаш йола молхаш ханнахьа дIакхачийтар, уж лерттIа хилийтар йоккха терко эшаш болх ба.
«Дарба ханнахьа чакхдоаккхаргдолаш, унахошта молхаш лоаттаяр, цу оагIонца ма хулла кхоачамбоацараш цахилийтар, из деррига лорашка шаьрдайтар тха декхар да», - аьлар, цу балхах дувцаш, министерствон кулгалхочун гIонча йолча Настаева Амината.
