Гӏалгӏайчен ахархоша, кхашка арабаьнна, болх дӏаболабир
Гӏалгӏай мехка дӏаболабир бӏаьстан гота болх, яхаш, дийцар «Сердало» газетага ГӏР Кулгалхочун зарбан болх лелабераша.
«Тушола бетта 10-ча дийнахьа денз, юртбоахаме дӏаболабергба кхашкара болх: хьалха дӏадувш дола ялат дӏадийна даргда бекарга бетта 10-ча денга кхоачаш, тӏехьа дувш дар - маьтсела бетта 25-ча денга кхоачаш.
Керттера терко тӏайохийтаргья хьажкӏашта, царна хьакъоастадаьд 18,7 эзар гектар лаьтта. Иштта лоархӏаме дакъа дӏалоацаргда доакъара лаьрхӏача культураша. Дӏабе лаьрхӏад мукх, гидуаргаш, коаратол, кхыдола баьцадаараш. Таханарча денга кхоачаш, цхьан даькъ тӏа дӏабийна баьннаб кен, мукх», - аьлар мехка кулгалхочо Келаматанаькъан Махьмуд-Ӏаьлас, ше цу хьала мах оттабеш.
ГӏР юртбоахама Министерствос цу доккхача гӏулакха юкъеяьхар еррига таронаш: болх беш я 480 гаргга трактор, 600 гаргга тӏехьатоссаш йола техника, кийчо яьй 100%. Ялат дӏадув моттиг кийчъяьй. Доагора-даьттан материалаш кхоачам болаш я, удобренеш – 90%, ги- 70%, бекарга бутт чакхбалаш деррига 100% кхоачаш хургда.
Мехкадас белгалдир, хаоттам хувцалуш хилар цу юкъе дӏалархӏа дезилга. Цӏаьхха, эттача шелало кхоачамбоацараш юкъедоах. Иштта ГӏР Кулгалхочо тӏадиллар юртбоахама Министерствонна, моллагӏа йола чоалхане хьал этта моттиг нийслой а, сиха оарцагӏдаргдола никъ лахар. ӏаьдала, юртбоахама, къахьегамхой керттера декхар да – ялат дӏадера болх лакхача боарам тӏа дӏабахьар, иштта республикан кхачан ӏалашо яр.
