Таьрахьашца дувзаденнарех йола вай мехкара Академи толамаш доахаш я
Ши шу дизар тахан Къилбаседа Кавказа эггара йоккхагӏа йолча проекта – «Таьрахьашца дувзаденнарех йолча Академе». Из хоам «Сердалога» бир мехкадаь зарбан болх лелабераша.
«Цу юкъа Академи вай мехка лоархӏаме моттиг дӏалоацаш, лоархӏаме болх дӏахьош хиннай. 9 эзар совгӏа саг ва цун программага гӏолла дийшараш. Магасерча «Ишкол 21» кампусе таханарча дийнахьа дешаш 500 гаргга кагирхой, бераш да. Царна юкъера цхьаццабараш болх шаьрбе болабенна, шоай къахьегама никъ кхоллаш ба. Къаьстта дега тоам беш да, уж кагирхой шоай кхоане укхаза, шоай цӏагӏа гуш хилар», - белгалдир мехкадас Келаматанаькъан Махьмуд-ӏаьлас.
Дикка толамаш доахарех я тахан мехкара бизнес-акселератор. Доакъашхоша къахьег цхьацца хӏамаш доаржадеш, шоай тоабаш хьакхоллаш, болх бе керда моттигаш хьаеллаш. Цхьацца хӏаман тӏехьа къахьегаш дӏабаха лаьрхӏа болча кагирхошта чӏоагӏа лоархӏаме да из. Российски Федераце тайп-тайпарча субъекташкара нах ба тахан Академе деша хьаухараш.
Къонабарий аьттув ба дешар чакхдаккха, болх шаьрбе, шоай гӏулакх хьаделла, иштта балха отташ новкъостал дергда царна. Дешара кластера Smart-отеле ӏеш болаш, мах боацаш дешар чакхдаккха, вахаре накъаяргйола говзал караерзае аьттув ба цар вай мехка. Къаман истори, культура, таханара вахар довзаш ба уж тахан.
«Доккха баркал оал аз из проект хьайийллача мецената Гуцарианаькъан Сафарбика Микаила. Цо гӏо дарах, вай мехка таханарча ханага хьежжа йола дешара моттиг хьайийллар, хӏаьта из кагирхошта боккха аьттув луш, беркате, шера никъ хьабеллаш дола гӏулакх да. Ши шу дизарца даькъалабувц аз Академе къахьегараш, еррига тоаба, доакъашхой! Баркал хилда шоана мехка кхоанен хӏама тоадара тӏехьа къахьегарах, кагирхошта шоай моттиг хьалаца гӏо деш хиларах»,- аьлар вай Мехкадас ший къамаьла юкъе.
