Боранаькъан Анита Гӏалгӏайченгара дакъа лоацаш я «Россе шера хьехархо» яхача яхье
Гӏалгӏайчене чакхъяьлар моттигера хьехархой яхьебалара оагӏув- «Россе шера хьехархо-2026». Цига республикан даькъ тӏа Илдарха-Гӏалан №4 йолча ишкола дикагӏа йола эрсий метта, литература хьехархо хилар Боранаькъан Анита. Цо бокъо яьккхар вай республика федеральни боарам тӏа гойта, цига мехка дикагӏа йола хьехархо яха цӏи яккхара яхьашка дакъа лаца.
Гӏалгӏайчен дешара, ӏилман Министерстве, «Сердало» газетага ма аллара, котало яккхара наькъ тӏа боалаш, хьехархой шоай мел йола говзал гойта, цу гӏулакха йоккха терко тӏаяхийта, дика къахьега дезаш ба. Эггара чоалханеча декхарех чакхбоал уж. Хьехархой шоашта йовзаш йоацача классашка 45 минота хьеха дезаш бар, хьехархочун интервью яхача даькъ тӏа дакъа лоацаш бар, шоай авторски балхаш довзийта дезар кхелахошта, говзанча хьехамаш дӏахьоча хана.
Боранаькъан Анитас гойтар шийна Iилма кӏоаргга довзаш хилар, начӏал хилар, иштта берашцара барт лахар, из бахьан долаш из яьлар массарел хьалха.
Ерригроссийски «Россе шера хьехархо» яха конкурс лаьрхӏа я хьехархочун дика професси юкъарлон теркамга яккхара, цун лерхӏам бара. Цул совгӏа, яхьа майда хӏара шера балха говзал эцара накъайоалаш я.
